Нашае расьледаваньне пачалося з фатаздымку, выяўленага ў профілі сацсеціва Яўгена Сафонава (архіў на профіль, фотаальбом) – тэрарыста так званай «Данецкай Народнай Рэспублікі».

Фатаздымак выкладзены ў фотаальбоме 27 лютага 2016 г. Сафонаў пазуе ў ім на тле танка Т-72Б 1989 года выпуску. На заднім пляне зафіксаваны цеплавоз, з чаго вынікае, што фота зробленае ў дэпо.

Выснова пра тое, што перад намі Т-72Б узору 1989 году, зробленая на падставе наяўнасьці на зафіксаваным танку элемэнтаў дынамічнае абароны “Кантакт-V” і прыцэльнай сыстэмы 1К13-49, якая ўваходзіць у комплекс кіраванага ўзбраеньня 9К120 “Сьвір”. На танку адсутнічае датчык ветру “ДВЕ-БС”, што дадаткова сьведчыць пра ягоную прыналежнасьць да вышэйпазначанай мадыфікацыі. Варта зазначыць, што Т-72Б 1989 г.в. ва Украіну ніколі не пастаўляўся, і таму ня можа зьяўляцца так званым трафеем. Давайце яшчэ раз пагледзім фатаздымак. Адразу ў вочы кідаецца трохкаляровы камуфляж зь зялёнай, чорнай і жоўтай фарбаю, які адсутнічае на танках, перададзеных «расейскім ваенторгам» тэрарыстычным утварэньням «Л/ДНР» (нагадаем, пра лютаўскія факты паставак “ваенторга” можна прачытаць у матар’яле “Крама “ваенторгу”: ТОП-5 лютаўскіх паставак ЗС РФ на Данбас”). У працэсе пошуку «крыніцы» пастаўкі танка, мы выявілі фотаальбом 5-й асобнай танкавай брыгады ЗС РФ (в/ч 46108, Улан-Удэ, Усходняя вайсковая акруга), які мае мноства фатаздымкаў танкаў Т-72Б 1989 г.в. у трохкаляровым камуфляжы, якія знаходзяцца ва ўзбраеньні другой танкавай роты першага батальёну. Схема камуфляжу й колеры супадаюць з выняткам таго, што зялёная фарба на танку Сафонава больш яскравая.

На гэтым этапе можна зрабіць здагадку, што танк з фатаздымку Сафонава, які знаходзіўся ва ўзбраеньні 5-й АТБр ЗС РФ, быў перададзены тэрарыстам. Гэта вынікае з наступных чыньнікаў:

• Т-72Б 1989 г.в. знаходзіцца ва ўзбраеньні 5-й АТБр
• Т-72Б 1989 г.в. не пастаўляўся ва Украіну і ня можа быць трафеем
• камуфляж танкаў на выяўленых фатаздымках ідэнтычны зь некаторымі выняткамі
• 5-я АТБр ЗС РФ была ўжо неаднойчы зафіксаваная ва Украіне (гл. тэматычныя спасылкі)
• 5-я АТБр ЗС РФ з восені 2015 году пачала пераўзбраеньне на найноўшыя мадыфікацыі Т-72Б3 (1, 2), з чаго вынікае, што расейскі «ваенторг» атрымаў магчымасьць перадаць танкі брыгады тэрарыстам «Л/ДНР».

UPD. Нашыя пільныя чытачы зьвярнулі ўвагу на самаробную дапрацоўку гэтага танка: зьмену вуглу падпораў для блёкаў дынамічнай абароны вежы, плюс дадаткова ўсталяваныя блёкі ДА “Кантакт-1” у неабароненых мейсцах. Вось як выглядаюць аналягічныя вырабы тэрарыстаў танкавага батальёна “ДНР” “Дызель”.

Тэматычныя спасылкі

5-я танкавая брыгада ЗС РФ у баёх за Дэбальцава

«Баявыя бураты рускага сьвету»: 5-я асобная танкавая брыгада ЗС РФ на Данбасе

«Пажары ў Бураціі» спалілі танкі 5-й АТБр ЗС РФ пад Дэбальцава

Буратаў 5-й танкавай брыгады ўзнагароджваюць мэдалямі «За вайсковую доблесьць»

Чарговы кавалер мэдалю «За вайсковую доблесьць» з 5-й танкавай брыгады

Дадатковая інфармацыя пра падразьдзяленьні 5-й танкавай брыгады растоўскай групоўкі сілаў уварваньня – «НА КІЕЎ-2»

Падразьдзяленьне 5-й танкавай брыгады УВА ў складзе расейскай групоўкі сілаў уварваньня

Азнаёміцца ​​з факталягічнай доказавай базай дадзеных расьледаваньняў InformNapalm што да ўдзелу ў баявых дзеяньнях ва Украіне больш чымся 60 вайсковых падразьдзяленьняў ЗС РФ можна праз спасылку http://bit.ly/RussianPresence.

Матар’ял падрыхтаваны да публікацыі на падставе ўласнага OSINT-расьледаваньня міжнароднай валянтэрскай групай InformNapalm.

На беларускую мову пераклаў Дзяніс Івашын.

(CC BY 4.0) Інфармацыя падрыхтаваная адмыслова для сайту InformNapalm.org, падчас поўнага або частковага перадруку й выкарыстаньня матар’ялу наўпроставая спасылка на аўтара і наш праэкт абавязковая.

Мы заклікаем чытачоў актыўна пашыраць нашыя публікацыі ў сацыяльных сетках. Наданьне матар’ялам расьледаваньняў шырокае агалоскі здатнае зьмяніць хаду інфармацыйнага і баявога супрацьстаяньня з Крамлём. Разам пераможам!