Валянтэры міжнароднае супольнасьці InformNapalm выявілі чарговага расейскага кадравага вайскоўца, які ў межах службовага заданьня знаходзіўся на Данбасе. У выніках новага OSINT-расьледаваньня ідэнтыфікаваны вайсковец-кантрактнік 34-й асобнай мотастралковай брыгады горнай (в/ч 01485, ст. Старажавая, КЧР) Паўднёвае вайсковае акругі, Рустам Нігматуллін.

Першасныя дадзеныя: Рустам Нігматулін (архівы на профіль, фотаальбом, кантакты), нарадзіўся 4 ліпеня, год нараджэньня – н/в. Родам з г.Сьцерлітамак Рэспублікі Башкортастан. Тэрміновую вайсковую службу праходзіў на Паўночным Каўказе ў 2008 годзе. На кантрактную службу ў 34-ю асобную мотастралковую брыгаду горную, як мяркуецца, паступіў у 2015 годзе. Пасада – наводнік.

У адрозненьні ад іншых расейскіх вайскоўцаў, Нігматулін больш асьцярожны, але ўсё ж некалькі фатаздымкаў і камэнтар раскрылі яго цалкам. Найбольш цікавае фота з фотакалажам, у якім Нігматулін пазуе на тле грузавога аўтамабілю «Урал» з нумарамі «42 17 ДК» – так званага данецкага корпусу, а таксама дарожнага паказьніка з украінскімі пазначэньнямі напрамку да “шпіталю” (укр. – лікарня) і “гатэлю” (укр. – готель).

34-я АМСБР горная, у адрозьненьні ад іншых расейскіх падразьдзяленьняў, якія прайшлі праз «растоўска-ўкраінскую камандыроўку», згадвалася ня гэтак часта. У лістападзе 2015 году вайскоўцы гэтага вайсковага злучэньня былі зафіксаваныя ў порце Наварасійска, адкуль яны выпраўляліся ў Сірыйскую камандыроўку (1, 2).

Матар’ял да публікацыі падрыхтаваны на падставе ўласнага OSINT-расьледаваньня міжнароднай валянтэрскай групай InformNapalm.

На беларускую мову пераклаў Дзяніс Івашын.

(CC BY 4.0) Інфармацыя падрыхтаваная адмыслова для сайту InformNapalm.org, падчас поўнага або частковага перадруку й выкарыстаньня матар’ялу наўпроставая спасылка на аўтара і наш праэкт абавязковая.