З 11 па 15 верасьня 2018 году амаль на ўсіх палігонах Цэнтральнае й Усходняе вайсковых акругаў пройдуць стратэгічныя камандна-штабныя вышкалы Збройных Сілаў РФ – «Восток-2018» (рас.). У іх маюць удзельнічаць Ціхаакіянскі й Паўночны флёты, будуць цалкам задзейнічаныя дэсантныя войскі, прыблізна 300 000 вайскоўцаў, 36 000 адзінак вайсковае тэхнікі, каля 1000 адзінак авіяцыі. Міністар абароны РФ Сяргей Шайгу запэўнівае, што вышкалы паводле сваіх маштабаў будуць буйнейшымі за савецкія апэратыўна-стратэгічныя вышкалы «Запад-1981».

Эшалёны з бронетэхнікай ЗС РФ / Scanpix

Расейскія вайсковыя экспэрты наўпрост зазначаюць, што ўсходні напрамак вышкалаў зьяўляецца ўмоўным і не скіраваны супроць Кітаю, наадварот – ён зьяўляецца адным з партнэраў гэтых вышкалаў. Расея ж на манэўрах будзе адпрацоўваць маштабны ваенны канфлікт: расейцы й кітайцы будуць правакаваць ЗША, у тым ліку праз марскую мяжу зь Японіяй, дзе знаходзяцца амэрыканскія вайсковыя базы. Для ўдзелу ў вышкалах «Восток-2018» у Расею перадысьлякуюць каля 3200 вайскоўцаў, больш за 900 адзінак тэхнікі й 30 лятальных апаратаў і гэлікоптэраў зь Кітаю.

Жаўнеры Народна-вызваленчай арміі Кітаю / Reuters

Расейская Фэдэрацыя можна зьдзейсьніць якую-кольвек правакацыю на моры й у паветры, але маштабнасьць гэтых манэўраў надае й вялізную прастору для надзвычайных падзеяў з войскамі і тэхнікай дзяржавы-агрэсара.

Калі ўзгадаць менш маштабныя манэўры «Запад-2017», якія праходзілі з 14 па 20 верасьня 2017 году і ў якіх удзельнічалі да 100 000 вайскоўцаў, то тады выгаданая краіна «Вэйшнорыя» ўмоўна перамагла Расею, бо апошняя зазнала падчас вышкалаў вялікія рэальныя страты. 14 верасьня на авіябазе «Шайкоўка» адбыўся інцыдэнт з расейскім звышгукавым ракетаносьбітам-бамбоўцам Ту-22М3, падчас якога быў значна пашкоджаны фюзеляж лятака. 16 верасьня разьбіўся навучальна-баявы лятак Як-130, у той жа дзень падчас заходу на баявы курс у гэлікоптэра Ка-52 адбыўся некантраляваны пуск трох некіраваных авіяцыйных ракетаў С-8.

Яны разарваліся непасрэдна ля гледачоў. У выніку выбуху аскепкамі былі параненыя тры чалавекі й пашкоджаныя два вайсковыя грузавікі, адзін зь якіх – машына кіраваньня БпЛА комплексу РБ-341В «Леер-3». У заплянаваных вышкалах «Восток-2018» мае ўдзельнічаць утрая большая колькасьць вайскоўцаў і тэхнікі, адпаведна й інцыдэнтаў можа быць таксама больш.

Характэрна, што здарэньні пачалі адбывацца яшчэ да афіцыйнага пачатку вышкалаў. Гэтак, 26 жніўня на чыгуначнай станцыі Пятроўскі Завод (Забайкальскі край, РФ) на вакзале паміж вайскоўцамі з эшалёну, што накіроўваўся на вышкалы «Восток-2018», і мясцовымі жыхарамі адбыўся канфлікт. Група мясцовых пачала кідаць у вайскоўцаў камяні, два расейскія жаўнеры зазналі параненьні й пабеглі да вагону-шпіталю, цывільныя вырашылі іх дагнаць і паспрабавалі прарвацца да вайсковага эшалёну, вартавы адкрыў вагонь і забіў аднаго зь мясцовых, яшчэ адзін быў паранены, астатнія разьбегліся.

Сьледчы камітэт РФ пачаў праверку паводле факту стральбы па мясцовых жыхарах з боку вайскоўцаў з гэтага эшалёну.

Вялікае значэньне зараз набывае й эканамічны аспэкт: пакуль Пуцін распавядае расейцам, што вельмі неабходная пэнсійная рэформа праз брак грошай у бюджэце, паралельна на самую маштабную за апошнія 40 гадоў (!) «гульню цягліцамі» выдаткоўваюць астранамічныя сродкі, і гэта без уліку выдаткаў на вайну ў Сірыі й на Данбасе.

Акцыя пратэсту супроць падвышэньня пэнсійнага ўзросту ў Омску / Дзьмітры Феактыстаў

Бяручы пад увагу гісторыю з прыморскімі партызанамі й зазначаны вышэй інцыдэнт, у жаўнераў і вайсковыя эшалёны з глыбі Расеі падчас падрыхтоўкі й правядзеньня манэўраў з боку мясцовых жыхароў могуць паляцець ужо ня толькі камяні.

Міжнародная выведвальная супольнасьць InformNapalm будзе адсочваць правядзеньне гэтых вышкалаў і інфармаваць нашых чытачоў. Раскрыцьцё любых плянаў і маршрутаў перасоўваньня расейскіх вайскоўцаў і тэхнікі будзе спрыяць кантролю за дзеяньнямі агрэсара, і, мажліва, дапаможа запабегчы выкананьню ім некаторых сваіх мэтаў і задачаў.
Выведвальныя дадзеныя, маніторынг, інфармацыю й прапановы можаце надаваць нам у “Твітэры” з хэштэгам #East201 або дасылаць на электронную пошту:

Матар’ял падрыхтаваў Раман Бурко адмыслова для сайту міжнароднае выведвальнае супольнасьці InformNapalm.

Рэдагаваў і пераклаў на беларускую мову Дзяніс Івашын.

Пашырэньне й перадрук з спасылкаю на крыніцу вітаюцца!
(Creative Commons — Attribution 4.0 International — CC BY 4.0 )

Рабіце рэпост і дзяліцеся зь сябрамі.
Падпісвайцеся на старонкі супольнасьці InformNapalm у Фэйсбук / Твітэр / Telegram
і апэратыўна атрымлівайце інфармацыю пра новыя матар’ялы.