У Расейскай Фэдэрацыі, пачынаючы з савецкіх часоў, любяць называць беларусаў “братэрскім народам”, а Беларусь – “братэрскай рэспублікай”. Гэтак жа яны любяць сьцьвярджаць, што культурнай дыстанцыі паміж краінамі не існуе, бо расейцы і беларусы маюць агульнарускую гісторыю, расейскую літаратурную мову, і прыналежнасьць большасці вернікаў да Рускай праваслаўнай царквы. Да таго ж у якасьці значнага аргумэнту для пацьверджаньня гэтых тэзаў яны выкарыстоўваюць той факт, што “Белоруссия” – удзельнік усіх інтэграцыйных праэктаў, ініцыяваных Расеяй на постсавецкай прасторы – “Саюзнай дзяржавы”, “Эўразійскага саюзу”, “Арганізацыі Дамовы аб калектыўнай бясьпецы” і іншых. Аднак усе гэтыя тэзы й аргумэнты – толькі публічны бок зьнешнепалітычных і ідэалягічных мэтаў расейскага кіраўніцтва што да Рэспублікі Беларусь.

Рэальнасьцю жа ёсьць тое, што Расея праз выкарыстаньне розных методаў узьдзеяньня спрабуе ўтрымаць Беларусь у сфэры свайго ўплыву, нэйтралізуючы падчас гэтага любыя праявы нацыяналістычных і патрыятычных настрояў у беларускім грамадзтве. Больш за тое, любая дзейнасьць канкрэтных асобаў або арганізацыяў, якія маюць антырасейскую ськіраванасьць і ўплывае на адраджэньне беларускае ідэнтычнасьці, сустракае жорсткі супраціў з боку расейскага кіраўніцтва і спэцслужбаў. У гэтым кантэксьце варта акцэнтаваць увагу на інфармацыйнай кампаніі, якую напачатку 2016 году разгарнулі расейскія СМІ і іх прарасейскія аналягі ў Беларусі з мэтай поўнае дыскрэдытацыі дзейнасьці спартова-патрыятычнага клюбу “Ваяр”, які зьяўляецца актыўным крылом беларускага грамадзка-палітычнага апазыцыйнага руху “Малады фронт“.

Спартыўна-патрыятычны клюб «Ваяр»

Рыторыка матар’ялаў на гэтую тэму мае характар абвінавачваньня ў (пакідаем у арыгінале) “развитии идей нацизма и милитаризма””, а таксама “создании ультранационалистической политической платформы, деятельность которой может привести Беларусь к трагическим последствиям и как следствие разрушению государства”. Характэрна тое, што гэтая кампанія прыцягнула для рэалізацыі сваіх мэтаў цэнтральны інфармацыйны рэсурс Міністэрства абароны Беларусі, што пацьверджвае наяўнасьць і актыўную дзейнасьць патэнцыйных агентаў уплыву Расейскай Фэдэрацыі ў вышэйшым вайскова-палітычным кіраўніцтве Беларусі. Для большасьці экспэртаў, палітычных і грамадзкіх дзяячоў, а таксама сябраў “Ваяра” і “Маладога Фронту” такая рэакцыя прапагандыстаў не сталася сюрпрызам, бо гэта ўкладваецца ў агульную канцэпцыю “Рускага сьвету”, але пры гэтым трэба зазначыць, што гадаванцы У.Пуціна не ўлічылі некалькі істотных момантаў.

Па-першае, на тэрыторыі Беларусі дзейнічаюць больш за 100 як афіцыйна зарэгістраваных, так і нелегальных прарасейскіх арганізацыяў, падрабязны пералік якіх апублікаваў “Малады Фронт”, назваўшы гэты сьпіс “чорнай сотняй”, праводзячы аналёгіі з атрадамі расейскай манархічнай чэрні, якая 100 гадоў таму дзеля абароны імпэрыі праз пагромы і гвалт распраўлялася зь іншаверцамі. Пры гэтым найяскравымі прадстаўнікамі гэтага сьпісу можна назваць – беларускае прадстаўніцтва “Россотрудничества”, інфармацыйна-аналітычны партал “Империя”, вайскова-патрыятычны клюб “Казачий Спас“, суполка “Антимайдан”, міжнародны рух “Интернациональная Россия”, “Евразийский гражданский союз”, “Русское культурно-просветительское общество”, “Русь молодая», «Русский дом», дзясяткі праваслаўных вайскова-патрыятычных клюбаў і мноства іншых.

Баявікі “Казачьего Спаса”

Усе пералічаныя арганізацыі відавочным чынам ўяўляюць вялізарную небясьпеку для Рэспублікі Беларусь, бо дзейнічаюць пры падтрымцы расейскага кіраўніцтва і пад заступніцтвам РПЦ, перасьледуючы галоўную мэту – падрыхтоўку падставаў для магчымай рэалізацыі крымскага сцэнару й адкрытай агрэсіі з боку РФ. Як падкрэсьліў рэдакцыі InformNapalm лідэр «Маладога Фронта» Зьміцер Дашкевіч, менавіта для супрацьдзеяньня пракрамлёўскай пятай калёне і быў створаны спартыўна-патрыятычны клюб «Ваяр», а таксама для непасрэднай падрыхтоўкі патрыётаў краіны для супраціву магчымай акупацыі з боку Расеі.

Па-другое, па сутнасьці, уся кампанія супроць “Ваяра” і “Маладога Фронта” – гэта інэрцыя прапагандысцкай машыны РФ, а рэальнай прычынай хваляваньня расейскага кіраўніцтва і іхных гадаванцаў у Беларусі зьяўляецца акцыя ў зборы матар’яльнай дапамогі для беларускіх добраахвотнікаў, якія прымаюць удзел у вайне на Данбасе на баку Украіны.

Тактычная група “Беларусь” ДУК ПС

Іх вельмі непакоіць той факт, што нацыяналістычны рух Беларусі набывае практычны досьвед вядзеньня баявых дзеяньняў непасрэдна супроць расейска-тэрарыстычных падразьдзяленьняў, якія зь вялікай доляй верагоднасьці ў недалёкай будучыні могуць быць накіраваныя і ў Беларусь для пашырэньня жыцьцёвай прасторы сваёй імпэрыі, як гэта вельмі ўпэўнена заяўляюць стваральнікі «Камітэта 25-га студзеня», сярод якіх фігуруе і міжнародны тэрарыст Ігар Стралкоў-Гіркін, актыўны ўдзельнік рэалізацыі крымскага сцэнару й акупацыі ўкраінскага Данбаса.

Стваральнікі “Комитета 25-го января”

Пераважная большасьць гэтых імпэрскіх шавіністаў наагул не разглядаюць якую-кольвечы самастойнасьць беларускага народу і нават не вызнаюць ягонае існаваньне. У Расеі кожнага дня павялічваецца патрэба ў «моцнай» руцэ, якая выявілася раптоўна і абрынулася ў 2014 годзе на рэвалюцыйную Украіну, у момант, калі яна зыходзіла крывёю сваіх лепшых сыноў, якія ахвяравалі свае жыцьці на алтар свабоды і дэмакратыі. Гэтая патрэба непазьбежна прывядзе да зьяўлення ва ўладзе людзей, якія лічаць рэжым Пуціна мяккацелым і нязграбным. Таму падобныя спартыўна-патрыятычныя клюбы як «Ваяр» маюць быць арганізаваныя ва ўсёй краіне, у кожным раённым цэнтры і мястэчку, нягледзячы на ​​магчымае значнае супрацьдзеянне як адэптаў рускага сьвету, гэтак і патэнцыйных агентаў уплыву Расейскай Фэдэрацыі. Патрыёты маюць ня толькі на словах дэкляраваць свае жаданьне абараняць сувэрэнітэт і тэрытарыяльную цэласнасьць свайго краю, але й на практыцы ўмець гэта эфэктыўна рабіць.

Спартыўна-патрыятычны клюб «Ваяр»

Як зазначыў Зьміцер Дашкевіч, такія ініцыятывы, як «Ваяр», збор сродкаў для беларусаў, што ваююць у зоне АТА на баку Украіны, акцыі салідарнасьці з Украінай, усё больш значны ўплыў беларускіх нацыяналістаў – разрываюць шаблон расейскім шавіністам, якія да нядаўняга часу былі перакананыя, што ў Беларусі ім будуць чысьціць боты, але цяпер яны выдатна ўсьведамляюць, што замест абутковай шчоткі ў руках шматлікіх будзе аўтамат.

Спартыўна-патрыятычны клюб «Ваяр»

Для атрыманьня дадатковай інфармацыі пра дзейнасьць спартыўна-патрыятычнага клюбу «Ваяр» зьвяртайцеся на сайт Маладога Фронта, а таксама на афіцыйныя паблікі клюбу ў сацсетках «VK» і ў “FB“.

Матар’ял падрыхтаваны Міжнароднай валянтэрскай супольнасьцю InformNapalm.

Актыўны распаўсюд матар’ялу дужа вітаецца!