OSINT-экспэрты міжнароднае валянтэрскае супольнасьці InformNapalm працягваюць адсочваць перадысьлякацыю падразьдзяленьняў ЗС РФ на ўсёй працягласьці мяжы Расеі з Украінай і Беларусьсю. Мілітарызацыя памежных з Украінаю і Беларусьсю раёнаў РФ маштабная і ёсьць рэальнай пагрозаю ня толькі для гэтых краінаў, але й для Захада. Мы прысьвяцілі гэтую публікацыю гадавіне пачатку Вялікай Айчыннай вайны. На жаль, пасьля 75 год, на зямлі, палітай крывёю мільёнаў ейных абаронцаў, працягваецца вайсковая агрэсія, але ўжо з боку іншай «братэрскай» краіны.

Напрацягу двух тыдняў у міжнароднае інфармацыйнае прасторы быў значны рэзананс з нагоды пачатку разгортваньня вайсковых базаў ля мяжы з Украінай і Беларусьсю. Адныя даведваліся, дзе месьцяцца Клінцы ў Бранскае вобласьці, уважліва вывучаючы адлегласьць да Чарнігава і Гомеля, іншыя з эксклюзыўнымі правамі ад ананімных інфарматараў раптам пачалі казаць пра яшчэ адную базу, якая разбудоўваецца ў Валуйках Белгарадзкае вобласьці РФ ля мяжы з Харкаўскай вобласьцю Украіны, і пра перакідваньне ў гэты горад 23-й АМСБр з Самары. Пра разбудову гэтай базы было вядома яшчэ з восені 2015 году, праз абвешчаныя тэндэры Мінабароны РФ.

Пра перакідваньне ж 23-й АМСБр InformNapalm паведамляў яшчэ ў студзені 2016 году, падаючы інфармацыю, што вайскоўцы гэтага вайсковага злучэньня адсьвяткавалі Новы год у модульных казармах на тэрыторыі базы. Мы не ўдзельнічаем у пагонях за сэнсацыямі, але толькі падаем для нашай аўдыторыі інфармацыю, атрыманую ў выніку OSINT-дасьледаваньняў.

Новая база 23-й АМСБр (в/ч 65349 – Самара ЦВА, в/ч 34670 – Валуйкі ЗВА) у гэты момант знаходзіцца на тэрыторыі аэрадрому гораду Валуйкі Белгарадзкае вобласьці. Капітальнае ж будаўніцтва паводле дзяржтэндэру Мінабароны РФ непадалёк Валуек у сяле Солаці зьдзяйсьняе прадпрыемства «Спецстрой» (рас.) (каардынаты).

Фота будаўніцтва вайсковага гарадку ў с.Солаці

Спадарожнікавы фатаздымак з кастрычніка 2015 году, які зафіксаваў разбудову вайсковага гарадку ў с.Солаці

 

У лютым 2016 году «Спецстрой» перадаў больш за дзьвесьці вагончыкаў з модульнымі канструкцыямі для абсталяваньня часовага мейсца знаходжаньня для адной тысячы чалавек. Новы ж вайсковы гарадок для в/ч з Самары ў Белгарадзкай вобласьці мае быць перададзены замоўцу ў лістападзе гэтага году.

У спадарожнікавым фатаздымку, які зафіксаваў лягер 23-й АМСБр у Валуйках станам на кастрычнік 2015 году, можна выразна пабачыць модульныя будынкі тыпу АПЛ-500, якія выкарыстоўваюцца на палігонах «Кадамаўскі» і «Кузьмінскі» у Растоўскае вобласьці.

Тэрыторыя лягеру павялічвалася праз прыбыцьцё новых вайскоўцаў з Самары, для якіх ставілі часовыя вайсковыя намёты (архівы 1, 2, 3).

Паведамленьне пра перакідваньне 23-й АМСБр у Валуйкі ня ёсьць таямніцаю, бо 23 лютага 2016 г. на плошчы гораду адбыўся марш з паказальным выступам выведнікаў гэтага падразьдзяленьня й з асабістым удзелам часовага выканаўцы абавязкаў камандыра 23-й гвардзейскай асобнай мотастралковай брыгады (в/ч 65349) палкоўніка Сяргея Казачкова.

Апроч камбрыга Казачкова ва ўзнагародных дакумантах, выдадзеных вайскоўцам в/ч 65349 у Валуйках, «засьвяціўся» камандыр 1-й батальёна-тактычнай групы – падпалкоўнік А. Негара.

Заўвага: батальённа-тактычныя і ротна-тактычныя групы (БТГр / РТГр) добра вядомыя ў кантэксьце «растоўска-ўкраінскіх камандыровак». Гэта незалежныя мабільныя зводныя групы ў складзе мотастралковых падразьдзяленьняў, узмоцненыя танкавай ротай (узводам), зьмяшаным артдывізіёнам (батарэяй) ствалавой артылерыі і РСЗВ, вайсковым СПА, таксама выведнікамі і іншым забесьпячэньнем. Падчас актыўнай фазы канфлікту на Данбасе, пачынаючы зь вясны 2014 году, мы назіралі дзясяткі БТГр і РТГр, збольшага ў Растоўскае вобласьці (гэтаксама ў Белгарадзкай і Варонежскай абласьцёх), некаторыя зь якіх прымалі непасрэдны ўдзел у баявых дзеяньняў на Данбасе.

Парк узбраення й тэхнікі 23-й АМСБр ў Валуйках знаходзіцца непадалёк лягеру. У панарамным фота ніжэй з магчымасьцю павялічэньня можна пабачыць дзясяткі аўтамабіляў «КамАЗ» рознай мадыфікацыі, як бартавыя тэнтаваныя машыны, гэтак і з адмысловым прызначэньнем.

Тэхніка й ўзбраеньне, сканцэнтраванае на тэрыторыі дзейнага аэрадрому г. Валуйкі:

Найноўшыя бронетранспартэры тыпу БТР-82А. Адметныя ідэнтыфікацыйныя асаблівасьці – камуфляжнае фарбаваньне, чырвоныя бартавыя нумары (у гэтым выпадку бартавы «234») і тактычны знак у выглядзе чырвонага квадрата з трыма кропкамі, а таксама вайсковыя рэгістрацыйныя нумары колавай тэхнікі ЗС РФ зь індэксам «76», якія сьведчаць пра прыналежнасьць да Цэнтральнае вайсковае акругі (ЦВА). У зьвязку з гэтым варта нагадаць, што вайскоўцы й бронетранспартэры 23-й брыгады з пазначанымі вышэй адметнымі асаблівасьцямі (бартавыя нумары й тактычныя знакі чырвонага колеру) InformNapalm фіксаваў у Растоўскае вобласьці і ва Украіне. На Данбасе ЗС РФ выкарыстоўвалі БТР-80, выведзеныя з штату брыгады пасьля частковага пераўзбраеньня на новыя БТР-82А, якія былі задзейнічаныя тактычнай групай 23-й АМСБр ва «ўкраінскай камандыроўцы» і потым былі перададзеныя «арміі наваросіі», гл. «Бронетэхніка й асабовы склад 23-й самарскай брыгады ў складзе НЗФ «наваросіі»».

• Пэўная колькасьць старэнькіх бронетранспартэраў БТР-80 зноў жа з знаёмым чырвоным ідэнтыфікацыйным маркаваньнем – бартавымі нумарамі й тактычнымі знакамі гэтай АМСБр.

• Буксаваныя 152-мм гаўбіцы «Мста» з модульнымі артылерыйскімі цягачамі на шасі «КамАЗ-63501» (архівы 1, 2, 3, 4) з ужо белымі тактычнымі знакамі брыгады ў выглядзе таго ж квадрата з трыма кропкамі, якія належаць 1-й гаўбічнай артылерыйскай батарэі. На фота камэнтары вайскоўцаў 23-й АМСБр пра новае мейсца службы й геалякацыя – Валуйкі.

• Аўтатранспарт на базе «Урал», у тым ліку і адмысловая тэхніка (перасоўная майстэрня) на базе гэтых аўтамабіляў з нумарным індэксам “76» ЦВА з знаёмымі тактычнымі знакамі брыгады. А таксама тэхніка кіраваньня, сувязі й забесьпячэньня брыгады, КШМ на базе БТР і аўтамабіляў.

Непадалёк мейсца дысьлякацыі «тэлепартаванай» з Цэнтральнай вайсковай у Заходнюю вайсковую акругу брыгады будуецца палігон, які будуць выкарыстоўваць для тактычных заняткаў, навучальных стрэльбаў і баявой падрыхтоўкі асабовага складу.

Напачатку чэрвеня 2016 году было зафіксаванае перакідваньне падразьдзяленьня СПА з ЗРК “Аса” і, меркавана, аднаго з падразьдзяленьняў выведвальнага батальёну, якія былі зафіксаваныя падчас разгрузцы ў Валуйках і пазьней ужо непасрэдна на тэрыторыі вайсковай базы. Прыбыцьцё першых эшалёнаў з узбраеньнем і тэхнікай 23-й АМСБр (архіў 1, 2) было зафіксаванае і ў траўні 2016 году.

Паводле нашых ацэнак, на гэты момант у Валуйкі перадысьлякаванае прыблізна 30-40% асабовага складу 23-й АМСБр. Сярод перакінутых падразьдзяленьняў зафіксаваныя мотастралкі, выведнікі, частка артылерыі і СПА, а таксама кіраваньне і забесьпячэньне гэтага вайсковага злучэньня.

У якасьці бонусу для чытачоў падаем невялікае відэа пра казус, які адбыўся з вайскоўцамі супрацьпаветранае абароны 23-й АМСБр падчас здачы нарматыў, і якія ў гэты момант знаходзяцца ў Валуйках.

Даведка: 23-я асобная мотастралковая брыгада, в/ч 34670 (Белгарадзкая вобласьць, г. Валуйкі і с. Солаці, на гэты момант паэтапна перакідваецца з г. Самара ЦВА, перадысьлякацыя мае скончыцца да канца 2016 году. Раней мела нумар: в/ч 65349 – Самара).

Структура: Кіраваньне, 1-ы мотастралковы батальён, 2-і мотастралковы батальён, 3-ці мотастралковы батальён, стралковая рота (снайпэраў), танкавы батальён, 1-ы гаўбічны самаходна-артылерыйскі дывізыён, 2-і гаўбічны самаходна-артылерыйскі дывізыён, рэактыўны артылерыйскі дывізыён, процітанкавы артылерыйскі дывізыён, зэнітны ракетны дывізыён, зэнітны ракетна-артылерыйскі дывізыён, выведвальны батальён, рота БПЛА, інжынэрна-сапёрны батальён, рота РХБА, батальён кіраваньня (сувязі), рота РЭБ, батарэя кіраваньня й артылерыйскай выведкі, узвод кіраваньня і радыёлякацыйнай выведкі, узвод кіраваньня, рамонтна-аднаўленчы батальён, батальён матар’яльнага забесьпячэньня, камэнданцкая рота, мэдычная рота, узвод інструктараў, узвод трэнажэраў, палігон, аркестар.

Узбраеньне й тэхніка: 40 адз. Т-72БМ, 1 адз. Т-72БК, 130 адз. БТР-82АМ, 15 адз. БТР-80, 15 адз. МТ-ЛБ, 18 адз. БМ-21 «Град», 36 адз. 152-мм СГ 2С3 «Акацыя» (зафіксаваныя 152-мм буксаваныя гаўбіцы «Мста-Б»), 18 адз. 120-мм мінамётаў 2С12 «Сані», 12 адз. 100-мм гарматаў МТ-12 «Рапіра», 12 адз. самаходных ПТРК 9П149 «Штурм-С», 4 адз. БРДМ-2, 12 адз. БМ 9А33БМ2(3) «Аса», 6 адз. БМ 9А34(35) «Страла-10», 6 адз. ЗСУ 2С6М «Тунгуска», 27 адз. ПЗРК 9К38 «Ігла».

Матар’ял да публікацыі падрыхтавалі Victory Krm і Іраклі Камахідзэ на падставе ўласнага OSINT-расьледаваньня валянтэраў міжнароднае супольнасьці InformNapalm.

На беларускую мову пераклаў Дзяніс Івашын.

 (CC BY 4.0) Інфармацыя падрыхтаваная адмыслова для сайту InformNapalm.org, падчас поўнага або частковага перадруку й выкарыстаньня матар’ялу наўпроставая спасылка на аўтара і наш праэкт абавязковая.

Заклікаем чытачоў актыўна пашыраць нашыя публікацыі ў сацыяльных сетках, на форумах і СМІ. Наданьне матар’ялам расьледаваньняў шырокае агалоскі здатнае зьмяніць хаду інфармацыйнага і баявога супрацьстаяньня з Крамлём.