У суботу, 5 лістапада 2016 году, валянтэрская аэравыведка зафіксавала ў населеным пункце Новы (Луганская вобласьць) перасоўваньне як мінімум чатырох буйнакалібравых гарматаў.

Здымкі былі перададзеныя для вывучэньня валянтэрам міжнароднае выведвальнае супольнасьці InformNapalm.

У выніку аналізу здымкаў і маніторынгу адкрытых крыніцаў інфармацыі было вызначанае наступнае:

1. У фота зафіксаваныя як мінімум чатыры 152-мм дальнабойныя буксаваныя гарматы 2А36 «Гіяцынт-Б» (максымальная далёкасьць стральбы аскепкава-фугасным знарадам – 28 км і актыўна-рэактыўным знарадам – 40 км).
2. Гарматы буксуюць расейскія вайсковыя грузавікі «Урал-632301», якіх ніколі не было ва ўзбраеньні ўкраінскае арміі і якія не маглі стаць трафеямі.
3. Каардынаты мейсца фіксацыі расейскага ўзбраеньня й тэхнікі: 48°29′14.5″N 38°35′14.8″E (мейсцазнаходжаньне ў wikimapia).

Паводле афіцыйных зводаў АТА, а таксама інтэрактыўнай мапы абстрэлаў украінскіх войскаў InfoLight вызначанае, што на працягу содняў 5 лістапада, а 19:20, 20:40 і 21:10 (паводле кіеўскага часу), населены пункт Навазванаўка быў абстрэляны менавіта з гарматаў з калібрам 152 мм.

Ёсьць усе падставы сьцьвярджаць, што расейскія акупацыйныя войскі выкарыстоўвалі для абстрэлаў украінскіх пазыцыяў у пазначаным раёне менавіта гарматы, якія зафіксавала аэравыведка.

Нагадаем, што гэта ня першы выпадак фіксацыі цяжкіх узбраеньняў расейскіх акупацыйных сілаў, які сьведчыць пра грубае парушэньне Менскіх дамоўленасьцей.

На працягу верасьня – кастрычніка 2016 г. валянтэры InformNapalm выявілі буйное скопішча танкаў і САУ ў Данецку за 15 км ад лініі разьмежаваньня, вызначылі няўнасьць танкаў у населеным пункце Раздольнае за 10 км ад лініі разьмежаваньня, а таксама 122-мм САУ 2С1 «Гвазьдзіка» ў Наваазоўску за 17 км ад лініі разьмежаваньня. Усе гэтыя інцыдэнты дэманструюць грубае парушэньне расейска-тэрарыстычнымі сіламі дамоўленасьцей пра адвод цяжкога ўзбраеньня за 25-км зону.

Апроч гэтага, выяўленае, што цяжкія гарматы расейскіх акупацыйных войскаў ня толькі не адведзеныя, але й актыўна выкарыстоўваюцца для абстрэлаў населеных пунктаў, якія знаходзяцца пад кантролем украінскае арміі.

Нагадаем, што ў кастрычніку 2016 г. таксама было зафіксаванае яшчэ адное буйное скопішча расейскае тэхнікі на акупаванай тэрыторыі. У кадар патрапілі 20 танкаў Т-64БВ і Т-72Б ранейшых мадыфікацыяў (асноўнае ўзбраеньне з калібрам 125 мм), 25 баявых машынаў пяхоты (БМП-1/БМП-2), 4 самаходныя гаўбіцы 2С1 «Гвазьдзіка» (узбраеньне з калібрам 122 мм), 5 бронетранспартэраў БТР-80, зэнітна-ракетны комплекс 9К35 «Страла-10» і іншая тэхніка.

Пераклаў на беларускую мову Дзяніс Івашын.

(CC BY 4.0) Інфармацыя падрыхтаваная адмыслова для сайту InformNapalm.org, падчас поўнага або частковага перадруку й выкарыстаньня матар’ялу наўпроставая спасылка на аўтара і наш праэкт абавязковая.

Заклікаем чытачоў актыўна пашыраць нашыя публікацыі ў сацыяльных сетках, на форумах і СМІ. Наданьне матар’ялам расьледаваньняў шырокае агалоскі здатнае зьмяніць хаду інфармацыйнага і баявога супрацьстаяньня з Крамлём.