Напярэдадні сьвяткаваньня Новага года, 31 сьнежня, расейскі вайсковы кантынгент у Сірыі зазнаў беспрэцэдэнтныя страты за ўсю сваю больш за двухгадовую ваенную кампанію. Міністэрства абароны РФ спрабавала схаваць дадзеныя пра надзвычайныя здарэньні ад грамадзкасьці, але ў СМІ й сацсеткі ўсё ж патрапіла інфармацыя, на якую МА РФ давялося рэагаваць публічна і з спазьненьнем на некалькі содняў.

31 сьнежня 2017 году ў Сірыі разьбіўся расейскі ўдарны гэлікоптэр Мі-24, загінулі два чальцы экіпажу. Характэрна, што толькі пасьля рэзанансу ў СМІ і ў сацыяльных сетках Міністэрства абароны РФ было вымушанае 3 студзеня 2018 году паведаміць пра інцыдэнт з значнымі разыходжаньнямі што да падрабязнасьцяў катастрофы. Было паведамленае, што гэлікоптэр разьбіўся з тэхнічнае прычыны.

Аднак у дзень катастрофы, 31 сьнежня, паводле паведамленьняў Telegram-каналу “Directorate 4”, адзін з рэсурсаў баявікоў заявіў, што іхныя сілы зьбілі расейскі гэлікоптэр з экіпажам на борце. Канал таксама разьмясціў аудыёперамовы, якія нібыта належаць баявікам.

Чытайце таксама: 48 000 расейскіх вайскоўцаў прайшлі праз Сірыю, шматлікія зь іх таксама ваявалі на Данбасе

У той жа дзень, 31 сьнежня 2017 году, па расейскай авіябазе “Хмэймім” ў Сірыі быў зьдзейсьнены мінамётны абстрэл. Паводле паведаменьня расейскага выданьня “Коммерсант” (рас.), якое спаслалася на дзьве ўласныя вайскова-дыпляматычныя крыніцы, у выніку абстрэлу авіябазы групоўкай радыкальных ісламістаў былі зьнішчаныя сем лятакоў:

• 4 франтавыя бамбоўцы Су-24;
• 2 шматмэтавыя зьнішчальнікі Су-35С;
• 1 вайскова-транспартны лятак Ан-72.

Параненьні маглі зазнаць больш за дзесяць вайскоўцаў.

4 студзеня Міністэрства абароны РФ з спазьненьнем было вымушанае таксама паведаміць пра факт мінамётнага абстрэлу й пра гібель двух расейскіх вайскоўцаў, аднак не падала інфармацыю пра зьнішчэньне авіягрупоўкі ПКС РФ.

Чытайце таксама: Расейскія прапагандысты раскрылі пазыцыі супрацьпавтеранай абароны на авіябазе “Хмэймім”

Расейскі вайсковы прапагандыст, Раман Сапанькоў, фігурант базы “Міратворца”, у сваім акаўнце сацсеціва “VK” выклаў фатаздымкі пашкоджанае й зьнішчанае ў выніку абстрэлу авіяцыйнае тэхнікі, якія былі зробленыя нібыта на авіябазе “Хмэймім” (1, 2, 3):

Таксама ён падае непацьверджаную інфармацыю пра пашкоджаньне цэлага авіяпарку тэхнікі: 6 бамбоўцаў Су-24, 1 зьнішчальніка Су-35С, лятака паветранага назіраньня й аэрафатаздымкі Ан-30, 1 гэлікоптэру  Мі-8.

Характэрна, што гэтыя вельмі значныя страты баявой тэхнікі й гібель вайскоўцаў адбыліся ўжо пасьля афіцыйнай заявы Уладзімера Пуціна пра “пераможнае” сканчэньне ваеннай апэрацыі й чарговае вывядзеньне расейскіх войскаў зь Сірыі, якую ён зрабіў падчас свайго афіцыйнага візыту ў гэтую краіну 11 сьнежня 2017 году. Расейскія жаўнеры й афіцеры працягваюць марна гінуць у ваеннай аперацыі, якая да таго ж афіцыйна ўжо завершаная. Пра бясконцыя ілжывыя заявы вайскова-палітычнага кіраўніцтва РФ што да вывядзеньня расейскіх войскаў зь Сірыі міжнародная выведвальная супольнасьць InformNapalm падавала раней дастаковы абсяг інфармацыі.

Катастрофы ПКС РФ у Сірыі

У лістападзе 2015 году расейскі бамбовец Су-24 быў зьбіты турэцкім зьнішчальнікам F-16 праз парушэньне паветранай прасторы Турэччыны. Падчас выратавальнай апэрацыі ў пошуку лётнікаў зьбітага Су-24 зь зямлі быў таксама зьбіты расейскі шматмэтавы гэлікоптэр Мі-8. У лістападзе 2016 году расейскі зьнішчальнік МіГ-29К разьбіўся ў Міжземным моры ля берагоў Сірыі пасьля ўзьлёту з авіяносца «Адмірал Кузьняцоў». У сьнежні 2016 году ў Міжземным моры падчас пасадкі на авіяносец «Адмірал Кузьняцоў» адбылася аварыя зь яшчэ адным расейскім зьнішчальнікам Су-33. У жніўні 2016 году ў сірыйскай правінцыі Ідліб зь зямлі быў зьбіты гэлікоптэр Мі-8. У красавіку 2016 году ля гораду Хомс разьбіўся расейскі ўдарны гэлікоптэр Мі-28Н «Начны паляўнічы». У ліпені 2016 году таксама быў зьбіты сірыйскі гэлікоптэр Мі-25, якім кіраваў расейскі экіпаж. У кастрычніку 2017 году расейскі франтавы бамбовец Су-24 разьбіўся падчас узьлёту з авіябазы “Хмэймім”. І гэта толькі вядомыя грамадзкасьці страты ПКС РФ, якіх насамрэч відавочна значна больш.

Нагадаем, што ў верасьні 2016 году міжнародная выведвальная супольнасьць InformNapalm апублікавала матар’ялы й інфаграфіку з асабістымі дадзенымі 116 афіцэраў ПКС РФ, якія ўдзельнічалі ў бамбаваньнях мірнага насельніцтва ў Сірыі. Гэтыя матар’ялы выклікалі вялікі грамадзкі розгалас, былі пераведзеныя на 13 моваў і пашыраныя шматлікімі замежнымі СМІ.

Матар’ял да публікацыі падрыхтавалі Раман Бурко і Дзяніс Івашын адмыслова для сайту міжнароднае выведвальнае супольнасьці InformNapalm.

Падчас выкарыстаньня інфармацыі актыўная спасылка на крыніцу абавязковая.
(Creative Commons — Attribution 4.0 International — CC BY 4.0 )

Рабіце рэпост і дзяліцеся зь сябрамі.
Падпісвайцеся на старонкі супольнасьці InformNapalm у Фэйсбук / Твітэр / Telegram
і апэратыўна атрымлівайце інфармацыю пра новыя матар’ялы.