Расейскае сьледзтва абвінавачвае супрацоўнікаў Фэдэральнае службы бясьпекі РФ у стварэньні злачыннай групоўкі, якая складалася з байцоў прыватнай вайсковай кампаніі «E.N.O.T. corp», што ваявалі на Данбасе й арганізоўвалі шкаленьне жыхароў Беларусі ў лягерох баявой падрыхтоўкі на тэрыторыі РФ. Паводле вэрсіі сьледзтва, банда была створаная для нападу на групы кантрабандыстаў.

Згодна з матар’яламі сьледзтва, у сьнежні 2016 году супрацоўнікі спэцыяльнага падразьдзяленьня ФСБ зьдзейсьнілі рэйд у дачыненьні да групы кантрабандыстаў, якія займаліся незаконным завозам смартфонаў і іншай дарагой электронікі ў паштовых пасылках у Расею. Сілавую падтрымку ў рэйдзе спэцслужбам надавалі ўзброеныя баявікі з прыватнай вайсковай кампаніі (ПВК) «E.N.O.T. corp» (рэгіянальная ГА “Единые народные общинные товарищества”), якія раней удзельнічалі ў вайне супроць Украіны на Данбасе ў складзе расейскіх гібрыдных сілаў. Цікава, што ФСБ разам з байцамі «E.N.O.T. corp» канфіскавалі ў кантрабандыстаў тэхніку на агульную суму 27 мільёнаў расейскіх рублёў (прыблізна 430 тыс. USD).

Чальцы “E.N.O.T. corp.” патрапілі ў распрацоўку супрацоўнікаў Службы аховы канстытуцыйнага ладу й барацьбы з тэрарызмам ФСБ РФ. У жніўні 2018 году пасьля ўдзелу ў канфлікце, зьвязаным з спрэчкай вакол дзялянкі зямлі, былі затрыманыя два ўдзельнікі арганізацыі.

У кастрычніку 2019 году супроць двух супрацоўнікоў Службы контрвыведвальнага забесьпячэньня аб’ектаў транспарту й сувязі ФСБ РФ і ўзброеных байцоў «E.N.O.T. corp», якія дапамагалі ім, распачалі крымінальную справу адносна бандытызму.

Агулам у справе што да стварэньня банды фігуравала 11 падазраваных. У адпаведнасьці з крымінальным кодэксам РФ ім магло пагражаць пакараньне да 20 гадоў пазбаўленьня волі.

Аднак неўзабаве супрацоўнікі ФСБ – Антон Баракшэў і Аляксандар Мрышчук – былі вызваленыя з-пад варты. Пад арыштам засталіся толькі прыхільнікі тэрарыстычнага ўтварэньня “Л/ДНР”, а таксама баец спэцназу Галоўнага ўпраўленьня Генштабу (колішняе ГРУ) Збройных сілаў РФ, які суправаджаў іх на тэрыторыі акупаванага Данбасу (гэтая справа можа выразна сьведчыць пра нутранае супрацьстаяньне “вежаў Крамля”, канкурэнтную барацьбу й варажнечу паміж ФСБ і ГУ Генштабу ЗС РФ – заўв.).

28 кастрычніка 2019 году кіраўнік Сьледчага камітэту РФ Аляксандар Бастрыкін асабіста падоўжыў тэрмін сьледзтва гэтай справы да лютага 2020 году. Таксама сьледчыя плянуюць прыцягнуць да справы яшчэ больш людзей – апроч 11 ужо арыштаваных. Апошнія арышты, паводле сьведчаньняў крыніцы выданьня “Медуза”, інфармаванай пра перабег сьледчага працэсу, былі зьдзейсьненыя ў сьнежні 2019 году. Шэраг фігурантаў справы ўтрымліваюць пад вартаю ў сьледчым ізалятары гораду Краснадар.

26 сьнежня ў журналісткі выданьня “Новая газета” Юліі Палухінай адбыўся вобшук, у гэты ж дзень яна была дапытаная. Палухіна на гэты момант фігуруе ў справе ў якасьці сьведкі, аднак адвакаты не выключаюць, што яна можа быць пераведзеная ў статус абвінавачанай. Вядома, што журналістка публікавала матар’ялы пра расейскія незаконныя збройныя фармаваньні на тэрыторыі Крыму й Данбасу, у тым ліку і пра «E.N.O.T. corp».

 “E.N.O.T. corp.” на Данбасе

Нагадаем, у красавіку 2015 году міжнародная выведвальная супольнасьць InformNapalm апублікавала дадзеныя пра ўдзел наймітаў «E.N.O.T. corp» у зачыстках казачых бандфармаваньняў “Л/ДНР” у інтарэсах ФСБ РФ.

У 2017 годзе супольнасьць InformNapalm апублікавала інфармацыю пра абвастрэньне супярэчнасьцей між «E.N.O.T. corp» і арганізацыяй «Союз добровольцев Донбасса» (рас., скароч. “СДД”), якую асабіста куруе памочнік Уладзімера Пуціна Уладзіслаў Суркоў.

Баявая падрыхтоўка жыхароў Беларусі

Цягам некалькіх гадоў, з 2016 па 2018 г., байцы ПВК «E.N.O.T. Corp.» зьдзяйсьнялі актыўнае вэрбаваньне беларускіх навучэнцаў для сталых лягероў баявой падрыхтоўкі, арганізаваныя з падтрымкаю расейскага праваслаўнага духавенства.

Чытайце таксама: Спэцрасьледаваньне: ваяры “русского мира” ў Беларусі чакаюць на свой час

У 2016 годзе арганізацыя шкаленьня гэтых навучэнцаў праходзілася пад кантролем аднаго зь лідэраў бандфармаваньня «ЛНР» «Русич» расейскага нэанацыста Аляксея Мільчакова.

Інструктары й навучэнцы расейскага лягеру баявой падрыхтоўкі, А.Мільчакоў стаіць у першым шэрагу (чацьверты праваруч)

Датычнасьць да накіраваньня беларусаў у гэтыя лягеры патэнцыйных будучых байцоў “русского мира” ў Беларусі мела віцебская арганізацыя аўганцаў «Братство» і вайскова-патрыятычныя клюбы з Талачына й Друцка, арганізаваныя на базе мясцовых прыходаў Маскоўскага патрыярхату.

Навучэнцы расейскага лягеру баявой падрыхтоўкі «E.N.O.T. corp»

Камандыр ПВК «E.N.O.T. Corp.» Раман Целянкевіч (пазыўны «Водяной», рас.), адзін зь фігурантаў крымінальнай справы і ўдзельнік баявых дзеяньняў на Данбасе, непасрэдна зьвяртаўся да навучэнцаў баявога лягеру з асаблівымі зычэньнямі:

“Не думайте, что вы приехали отдохнуть и хорошо провести время. Вы здесь, чтобы получить знания и после применить их на практике”.

Шыхтаваньне навучэнцаў расейскага лягеру баявой падрыхтоўкі «E.N.O.T. corp»

Чытайце таксама: Спэцрасьледаваньне: Актыўная падрыхтоўка праваслаўнага Талібана ў Беларусі

Даведка

«E.N.O.T. corp»- прыватная вайсковая кампанія, байцы якой удзельнічалі ў некалькіх ваенных канфліктаў у інтарэсах Расейскае Фэдэрацыі. Заснаваная рухам “Народный собор” (рас.) на плятформе асацыяцыі вайскова-патрыятычных клюбаў “Резерв”. Сустаршынёю руху “Народный собор” зьяўляецца Уладзімер Хамякоў, матар’ялы якога неаднаразова публікаваліся на афіцыйным сайце “E.N.O.T. corp. (архіў). Сам Хамякоў рэзка крытыкаваў Уладзіслава Суркова, зьвінавачваў яго ў “сливе новороссии”.

Матар’ял падрыхтаваны адмыслова для сайту міжнароднае выведвальнае супольнасьці InformNapalm.

Рэдагаваў і пераклаў на беларускую мову Дзяніс Івашын.

Загалоўнае фота – militaryarms.ru.

Пашырэньне й перадрук з спасылкаю на крыніцу вітаюцца!
(Creative Commons — Attribution 4.0 International — CC BY 4.0 )

Рабіце рэпост і дзяліцеся зь сябрамі.
Падпісвайцеся на старонкі супольнасьці InformNapalm у Фэйсбук / Твітэр / Telegram
і апэратыўна атрымлівайце інфармацыю пра новыя матар’ялы.

InformNapalm – гэта вядомы й цалкам незалежны міжнародны валянтэрскі праэкт, які працуе цягам ужо больш за 5 гадоў.

Мы ня маем аніякай фінансавай падтрымкі ад ураду якой-кольвек краіны ці донараў, адзінымі мэцэнатамі інфармацыйнага праэкту зьяўляюцца ягоныя валянтэры й чытачы, якія ангажуюць свае сілы, час і сродкі для супрацьдзеяньня расейскай інфармацыйнай агрэсіі. Вы таксама можаце падтрымаць InformNapalm або сваімі ведамі й навыкамі, або ахвяраваньнем на ўтрыманьне сайту й разьвіцьцё праэкту. Фінансава нас можна падтрымаць або дабрачынным унёскам праз LiqPay, або стаць «патронам» і падпісацца на штомесячныя мініўнёскі праз сеціва Patreon.