Упершыню інфармацыя пра прысутнасьць на акупаванай Расейскай Фэдэрацыяй тэрыторыі ўкраінскага Данбасу сучаснай сыстэмы арбітальнага падаўленьня «Тырада-2» зьявілася 16 сакавіка 2019 году ў справаздачы СММ АБСЭ. Гэта сталася для валянтэраў InformNapalm пэўнай сэнсацыяй, бо паводле дадзеных адкрытых крыніцаў, Міністэрства абароны РФ толькі плянавала ў 2019 годзе паставіць ва ўзбраеньне комплекс «Тырада-2» у Цэнтральнай вайсковай акрузе Расеі.

Валянтэры міжнароднае выведвальнае супольнасьці InformNapalm дасьледавалі гэтую інфармацыю й надалі ёй шырокую агалоску ў СМІ з дадатковымі тлумачэньнямі. Наяўнасьць гэтае сыстэмы на Данбасе сьведчыць ня толькі пра правядзеньне выпрабаваньняў найноўшых расейскіх сыстэмаў РЭБ у баявых умовах супроць ўкраінскае арміі, але й пра спробы Расейскае Фэдэрацыі паставіць радыёперашкоды стратэгічнаму дрону ЗША RQ-4B Global Hawk, які пэрыядычна зьдзяйсьняе маніторынг ўздоўж лініі разьмежаваньня.

У адкрытых крыніцах інфармацыя пра навейшую расейскую сыстэму арбітальнага падаўленьня «Тырада-2» адсутнічала. Не было зразумела і як выглядае гэтая сыстэма, бо пошукавыя сэрвісы выдавалі даволі супярэчлівыя дадзеныя з фота розных сыстэмаў і комплексаў РЭБ. А ў асобных артыкулах тэматычных СМІ фігуравалі толькі ілюстрацыйныя фота, ніводнае зь якіх ня мела канкрэтнага подпісу й утрымлівала цэлы пералік сыстэмаў РЭБ, што значна ўскладняла пошук. Менавіта таму мы сьпярша надалі толькі фота макету адной з мадыфікацыяў гэтай сыстэмы, каб не ўвесьці сябе й чытачоў у зман.

 Фота: макетаваны выгляд «Тырада-2С», прадстаўлены на міжнароднай выставе «Макс-2013»

3 красавіка 2019 году твітэр-канал украінскае місіі ў АБСЭ апублікаваў фота з БпЛА аўтаматызаванай станцыі перашкодаў Р-330Ж «Житель» (рас.) і комплексу «Тырада-2», якія былі зафіксаваныя СММ АБСЭ непадалёк населенага пункту Южна Ламуватка Луганскае вобласьці.

У фота АБСЭ не былі пазначаныя дакладныя каардынаты, таму валянтэры супольнасьці InformNapalm вывучылі агульнадаступныя спадарожнікавыя здымкі ў сэрвісе Google maps і выявілі дакладнае мейсца фіксацыі – гэта мясцовасць з каардынатамі 48.418126 38.511170. Таксама мы вызначылі, што ў здымках гэтага раёну, пачынаючы з 2017 году пэрыядычна знаходзяцца кунгі з антэнамі на армейскіх грузавіках, што сьведчыць пра сталую прысутнасьць там сыстэмаў РЭБ.

З дапамогаю фота «Тырада-2» з дрону АБСЭ пошук сапраўдных фатаздымкаў гэтага таемнага комплексу ўдалося звузіць, якія праз нядбайнасьць прэс-службы МА РФ патрапілі ў Інтэрнэт. Верагодна, спачатку яны былі апублікаваныя ў артыкуле на сайце Міністэрства абароны РФ, скуль патрапілі ў “РИА Новости“ (рас.), бо менавіта з спасылкай на гэтыя крыніцы й удалося выявіць адную зь нешматлікіх сапраўдных фота «Тырада-2» – ў перадруку навіны на Baltnews.lt.

Фото ня мела подпісу, які б сьведчыў што гэта менавіта «Тырада-2», але ўтрымлівала інфармацыю пра крыніцу – “РИА Новости”. Таксама нам удалося знайсьці яшчэ адное фота, таксама без подпісу, якое выкарыстоўвалася ў якасьці ілюстрацыі да артыкулу пра найноўшыя расейскія распрацоўкі РЭБ.

18.07.2018. Военнослужащий управляет БПЛА на окружном этапе конкурса по полевой выучке среди подразделений радиоэлектронной борьбы Южного военного округа на полигоне Николо-Александровском в Ставропольском крае.
Денис Абрамов / РИА Новости

На заднім пляне фатаздымку можна пабачыць тую ж сыстэму, толькі з разгорнутай другой антэнай. Згодна з подпісам да фота, яно зробленае 18.07.2018 году на Нікола-Аляксандраўскім палігоне ў Стаўрапальськім краі РФ.

Параўнаньне характэрных элемэнтаў сыстэмы арбітальнага падаўленьня «Тырада-2»

Валянтэры InformNapalm параўналі фота з БпЛА з справаздачы СММ АБСЭ на Данбасе і фатаздымак гэтай сыстэмы, зроблены на палігоне МА РФ, і прыйшлі да высновы, што гэта адна і тая ж сыстэма – «Тырада-2».

Дакладнае вызначэньне й ідэнтыфікацыя гэтай сыстэмы арбітальнага падаўленьня вельмі важныя. Расейцы спрабавалі схаваць раскрыцьцё выявы гэтага комплексу РЭБ, аднак з дапамогаю інфармацыі з справаздачаў СММ АБСЭ нам удалося апазнаць гэтую сыстэму. Спадзяемся, што нашая інфармацыя дапаможа праўкраінскім жыхарам акупаваных тэрыторыяў дакумантаваць факты ваеннага ўварваньня Расейскае Фэдэрацыі. Для ідэнтыфікацыі тыпаў ўзбраеньня й вайсковай тэхнікі дзяржавы-агрэсара можна таксама выкарыстоўваць інтэрактыўную базу дадзеных супольнасьці InformNapalm Russian Aggression. Разам пераможам!

Матар’ял падрыхтаваны адмыслова для сайту міжнароднае выведвальнае супольнасьці InformNapalm.

Пераклаў на беларускую мову Дзяніс Івашын.

Пашырэньне й перадрук з спасылкаю на крыніцу вітаюцца!
(Creative Commons — Attribution 4.0 International — CC BY 4.0 )

Рабіце рэпост і дзяліцеся зь сябрамі.
Падпісвайцеся на старонкі супольнасьці InformNapalm у Фэйсбук / Твітэр / Telegram
і апэратыўна атрымлівайце інфармацыю пра новыя матар’ялы.