Вайна ў Сірыі паступова набірае абароты і вельмі далёкая ад завяршэньня, а «лягістыка вайны» патрабуе ад Расеі ўсё больш рэсурсаў. Адную з галоўных роляў у забесьпячэньні расейскай групоўкі войскаў у Сірыі грае вайскова-транспартная авіяцыя, таму ня дзіўна, што колькасць расейскіх авіябазаў, празь якія йдзе перакідваньне вайсковых грузаў на Блізкі Усход, паступова пашыраецца.

Дадзеныя чарговага OSINT-расьледаваньня, зьдзейсьненага валянтэрамі міжнароднае супольнасьці InformNapalm, даказваюць, што Крэмль задзейнічаў у транспартных маршрутах у Сірыю і экіпажы лятакоў авіябазы «Сешча», якая знаходзіцца ў аднайменным горадзе Бранскае вобласьці РФ. На ёй базуецца 566-ы транспартны авіяполк (в/ч 41495) з складу 12-й дывізіі ВТА 61-й паветранай арміі. Ва ўзбраеньні палку маюцца, у тым ліку, і лятакі Іл-76 і Ан-124.

Пра «сірыйскую» камандыроўку лётчыкаў 566-га авіяпалку сьведчыць інфармацыя з блёгу расейскага бортінжынэра, старэйшага лейтэнанта Дзьмітрыя Фралова 15.11.1986 г.н. (спасылкі на архіў профілю: https://archive.is/6TSkQ, кантакты: https://archive.is/jpOta, альбом: https://archive.is/3taep). Згодна з дадзенымі профілю ён зьяўляецца выпускніком Авіяцыйнага вайсковага тэхнічнага унівэрсытэта (2006 г).

У самым цікавым фатаздымку, датаваным 17 студзеня 2016 г., зафіксаваны відавочна сірыйскі краявід, маецца і адпаведны геатэг (Латакія, база Хмэймім):

Да таго ж, сам Фралоў ў дыялёгу пад фота прызнаецца ў тым, што гэта Сірыя:

На нагруднай нашыўцы камбінезону праз павялічэньне можна прачытаць ягонае званьне, прафэсію й прозьвішча:

Любы бортінжынэр – гэта чалец лётнага экіпажу паветранага судну, то бок ён не належыць да звычайнага абслуговага пэрсаналу. Фралоў, цалкам мажліва, зьяўляецца чальцом экіпажу транспартніка Ан-124 (але не ІЛ-76), пра што сьведчыць ягонае іншае фота з працоўнага мейсца:

Каардынаты авіябазы “Сешча”: 53°42’58″N   33°20’35″E і знаходжаньне на мапе:

Выгляд авіябазы з паветра:

Да нядаўняга часу фактычна адсутнічалі канкрэтныя фота- або відэаматар’ялы, якія б зьвязвалі 566-ы авіяполк зь сірыйскімі падзеямі. Хаця раней аудыёвыведка некалькі разоў фіксавала пералёты зь «сірыйскім» ухілам, дзе фігуруе Сешча й іншыя асноўныя пункты паветранай транспартнай артэрыі (Крымск, Маздок, Талмачова і інш.). З гэтым можна падрабязна азнаёміцца ў наступных спасылках:

– рэйс RA-82035 (Сешча-Пскоў-Сірыя): http://mil-avia.livejournal.com/114905.html

– рэйс RA 82037 (Сешча-Талмачова-Сірыя (?): Http://milavia.blogspot.com/2015/10/3-82037-124-76.html

– рэйс RA-82035 – пералёт з Маздока ў Сешчу, які ледзьве ня скончыўся аварыяй: http://mil-avia.livejournal.com/123436.html

Такім чынам, усе гэтыя дадзеныя сьведчаць пра тое, што вайскова-транспартная авіяцыя, у тым ліку 566-ы авіяполк, удзельнічае ў сірыйскім канфлікце, дапамагае рэжымам Асада і Пуціна, і,  такім чынам, таксама мае дачыненьне да злачынстваў супроць мірных грамадзянаў Сірыі.

Паводле афіцыйных дадзеных справаздачы міжнароднае праваабарончае арганізацыі Syrian Network for Human Rights (SNHR), станам на 17 сьнежня 2015 году з-за расейскіх авіяўдараў загінулі 570 мірных жыхароў, зь якіх 152 чалавекі – гэта дзеці і 60 – жанчыны. У справаздачу ўвайшла толькі пацьверджаная інфармацыя, таму верагодная колькасьць ахвяраў расейскай авіяцыі сярод мірнага насельніцтва Сірыі можа быць нашмат больш.

Матар’ял да публікацыі падрыхтаваны на падставе ўласнага OSINT-расьледаваньня міжнароднай валянтэрскай групай InformNapalm. Аўтар расьледаваньня – Мікалай Махно.

На беларускую мову пераклаў Дзяніс Івашын.

(CC BY 4.0) Інфармацыя падрыхтаваная адмыслова для сайту InformNapalm.org, падчас поўнага або частковага перадруку й выкарыстаньня матар’ялу наўпроставая спасылка на аўтара і наш праэкт абавязковая.

Актыўны распаўсюд у сацсетках вітаецца!