Сёньня падчас прэс-канфэрэнцыі ў Кіеве камандыр міжнароднага міратворчага батальёну імя Джахара Дудаева Адам Асмаеў заявіў, што Расейская Фэдэрацыя рыхтуе тэракты ў акупаваным Крыме з мэтай дыскрэдытацыі Украіны і стварэньня падставы для пачатку поўнамаштабнага наступу. Ён растлумачыў, што такая інфармацыя атрыманая з уласных вартых даверу крыніцаў. Вядома, што з 4 па 9 студзеня 2016 году ў акупаваны Крым прыбылі чатыры групы байцоў кадыраўскага элітнага спэцатраду «Церак» (кожная група складаецца з 5-7 чалавек). Мэта іх перакідваньня на паўвыспу – арганізацыя тэрактаў.

Адам Асмаеў падкрэсьліў, што паводле наяўнай інфармацыі, кадыраўскія баявікі маюць намер арганізаваць тэракты на Куйбышаўскім і Цэнтральным рынках гораду Сімфэропалю і ў раёне Ангарскага перавалу на трасе Сімфэропаль-Ялта.

Таксама пакуль правяраецца інфармацыя што да магчымых тэрарыстычных нападаў на праваслаўную царкву ў Сімфэропалі і дывэрсыяў у Сэвастопалі.

Паводле папярэдніх дадзеных, падчас расейскай спэцаперацыі, як складовай часткі шырокамаштабнай інфармацыйнай правакацыі, плянуецца падрыў аднаго з караблёў Чарнаморскага флёту Расейскай Фэдэрацыі, які падлягае сьпісаньню.

Падчас падрыхтоўкі і ажыцьцяўленьня шырокамаштабных правакацыяў афіцэрамі ФСБ РФ будуць зьдзейсьненыя ператрусы і затрыманьні крымскіх татараў, якія асуджаюць акупацыю Крыма, і інсцэнаванае выяўленьне ў іх забароненай літаратуры і іншых прадметаў (шаўронаў, кантактных дадзеных і г.д), якія маюць наўпрост ці ўскосна прадэманстраваць «экстрэмісцкі ўкраінскі сьлед» у падрыхтоўцы тэрактаў. Таксама падчас правакацыяў для большага ўплыву на сусьветную супольнасьць можа быць разыграная карта «Украіна – ІДІЛ».

Чытайце таксама: Заява ўкраінскіх мусульманаў – добраахвотнікаў АТА пра правакацыі расейскага боку ў кантэксьце тэмы «Украіна і ІДІЛ»

Прэс-афіцэр батальёну імя Джахара Дудаева Аміна Акуева удакладніла, што інфармацыя пра заплянаваныя тэракты была атрыманая з крыніцаў у адміністрацыі Рамзана Кадырава, сілавых структурах Чачэніі і батальёне «Церак».

«Інфармацыя, якую яны падаюць празь некалькі асобаў, старанна пераправяраецца і аналізуецца. Некаторыя дадзеныя мы таксама атрымліваем праз пасярэднікаў, якія знаходзяцца ў трэйціх краінах, збольшага, эўрапейскіх. Таксама мы маем інфармацыйныя крыніцы на тэрыторыі акупаванага Крыма. Мы шмат каму зь іх давяраем… бо атрыманая ад іх інфармацыя прайшла праверку праз баявыя выхады», – падкрэсьліла Акуева.

Таксама, падчас прэс-канфэрэнцыі Адам Асмаеў удакладніў, што наступ на тэрыторыю Украіны на падставе «барацьбы з тэрарызмам і экстрэмізмам» разглядаецца вайсковым кіраўніцтвам РФ зь некалькіх напрамакаў: з тэрыторыі акупаванага Крыма, акупаванага Данбаса, альбо з двух напрамакаў адначасова.

«Канкрэтнай інфармацыі пра дакладны час ажыцьцяўленьня тэрактаў няма, але яны плянуюцца, пакуль не надыйшла адліга, якая абцяжарыць праходжаньне вайсковай тэхнікі», – дадаў камандыр батальёну імя Джахара Дудаева Адам Асмаеў.

У сваю чаргу, з уласных інсайдэрскіх крыніцаў міжнароднай валянтэрскай супольнасьці InformNapalm вядомае, што падрыхтоўка й ажыцьцяўленьне тэрактаў можа быць прымеркаванае да візыту Патрыярха Маскоўскага Кірыла ў Шамбезі (Швайцарыя), дзе на яго ўскладзеная функцыя апэратыўнага ўплыву на ўдзельнікаў Сходу Прадстаяцеляў і прадстаўнікоў усіх Памесных Праваслаўных Цэркваў. Менавіта для гэтага ў ліку аб’ектаў для тэрактаў ёсьц праваслаўныя храмы, каб абвесьціць вайну супроць Украіны ня толькі ў якасьці «антытэрарыстычнай», але й «духоўнай». Выкананьне «бруднай працы», ускладзенай на кадыраўцаў зь «Церака», таксама ня ёсьць выпадковым.

Нагадаем, што сход (сінаксыс) Прадстаяцеляў Памесных Праваслаўных Цэркваў, прымеркаваны да падрыхтоўкі Восьмага ўсеправаслаўнага сабору, пройдзе ў Швайцарыі з 22 па 29 студзені 2016 году. Цікава, што апошні Сёмы Сусьветны сабор адбыўся яшчэ ў VIII стагодзьдзі, а падрыхтоўка чарговага Сабору зьдзяйсьняецца ўжо каля 60 гадоў і яго правядзенне заплянаванае на 19 чэрвеня 2016 году ў Стамбуле. Студзеньскі сінаксыс таксама быў заплянаваны ў Стамбуле, але быў перанесены з-за «ўскладнёных стасункаў Расеі й Турэччыны».

Даведка: падрабязна пра падрыхтоўку кадыраўскага элітнага спэцатраду «Церак» распавядаў расейскі тэлеканал «Расея 1» у 2013 годзе: