20 траўня 2017 году расейска-тэрарыстычныя войскі дзеля дыскрэдытацыі ЗСУ абстралялі аўтобусную станцыю «Трудаўская» ў Пятроўскім раёне Данецка з аўтаматычнага 30-мм гранатамёту АГС-17. У выніку абстрэлу пацярпелі два мірных жыхары: Байра Віктар Барысавіч, 1963 г.н., і Усовіч Мікалай Анатолевіч, 1956 г.н. У здымках прапагандыста Сяргея Белавуса зь мейсца здарэньня можна выразна пабачыць рэшткі выбухоўніка ВМГ-М ад 30-мм гранаты ВОГ-17М. У маркаваньні пазначаная дата вытворчасьці – 1988 год.

Інфармацыйнае суправаджэньне правакацыі

Празь некалькі гадзінаў пасьля абстрэлу была рэалізаваная другая частка правакацыі. Быў задзейнічаны рупар акупацыйнае адміністрацыі, так званая агенцыя “ДАН” (Донецкое Агенство Новостей, рас.), якая абвінаваціла ў абстрэле ўкраінскіх вайскоўцаў. Інфармацыю імгненна падхапілі крамлёўскія прапагандысцкія інфармацыйныя рэсурсы й паблікі ў сацсетках. 42 тысячы вынікаў выдае пошукавік Google у выніку запыту “20 мая обстрел трудовские” (рас.).

21 траўня 2017 году ў афіцыйнай справаздачы маніторынгавае місіі АБСЭ ва Украіне пра гэты інцыдэнт было апублікаванае наступнае:

На аўтобуснай станцыі «Трудаўская» чальцы патруля Місіі ўбачылі тры сьвежыя мейсцы ўдараў на дзялянцы з дыямэтрам 50 м, а таксама аскепкі, паводле іхнае ацэнкі, ад гранатаў тыпу ВОГ. Адное зь мейсцаў удару (20-см адтуліна) знаходзілася на даху з усходняга боку будынку. Назіральнікі зазначылі, што дах таксама быў пашкоджаны аскепкамі. Другое мейсца было выяўленае ў бэтоннай тратуарнай плітцы, а трэйцяе – ў асфальце на паркоўцы. Паводле ацэнкі назіральнікаў, апошнія 2 мейсцы удараў узьніклі з прычыны трапленьня гранатаў, якімі стрэлілі з аўтаматычнага гранатамёту з паўночна-ўсходняга напрамку. Падрапіны ад аскепкаў і курава вакол абодвух мейсцаў удараў утварылі паўколы з дыямэтрам каля 0,9-1 м, якія цягнуцца з паўднёвага ўсходу на паўночны захад.

Такім чынам, прадстаўнікі СММ АБСЭ пацьвердзілі выкарыстаньне 30-мм гранатаў для станкавага гранатамёту, а таксама пазначылі паўночна-ўсходні напрамак прылёту гранатаў. Ведаючы тып і напрамак, скарыстаемся мапай разьмежаваньня бакоў liveuamap. Сьлед зазначыць, што максымальная далёкасьць палёту гранаты ВОГ-17М складае 1700-1800 мэтраў (даведка: мадэрнізаваная граната ГПД-30 – 2200 мэтраў). Адмерваем на мапе 1800 мэтраў у паўночна-ўсходнім напрамку ад аўтастанцыі «Трудаўская». Вынікае, што абстрэл быў зьдзейсьнены з тэрыторыі, падкантрольнай расейскім акупацыйным войскам. Або ж украінскія дывэрсанты з гранатамётам на плячох змаглі незаўважна перайсьці першую лінію абароны, затым жылыя масывы, зьдзейсьніць абстрэл і спакойна павярнуцца на свае пазыцыі.

24 траўня 2017 году аўтастанцыя паноўна была абстраляная, два мірныя жыхары былі параненыя: Салдатаў Уладзімер Іванавіч, 1953 г.н., і выкладчыца матэматыкі агульнаадукацыйнай школы №103 з прозьвішчам Жыліна.

Матар’ял да публікацыі падрыхтаваў Міхаіл Кузьняцоў. Дзякуем за апэратыўнае інфармаваньне пра падзеі, якія адбываюцца на акупаваных тэрыторыях, актывіста Necro Mancer.

Пераклаў на беларускую мову Дзяніс Івашын.

(CC BY 4.0) Інфармацыя падрыхтаваная адмыслова для сайту InformNapalm.org, падчас поўнага або частковага перадруку й выкарыстаньня матар’ялу наўпроставая спасылка на аўтара і наш праэкт абавязковая.

Падпісвайцеся на старонкі супольнасьці InformNapalm у Фэйсбук / Твітэр і апэратыўна атрымлівайце інфармацыю пра новыя матар’ялы.

Заклікаем чытачоў актыўна пашыраць нашыя публікацыі ў сацыяльных сетках, на форумах і СМІ. Наданьне матар’ялам расьледаваньняў шырокае агалоскі здатнае зьмяніць хаду інфармацыйнага і баявога супрацьстаяньня з Крамлём.