Карэспандэнт RT Мурад Гадзіеў выклаў у сеціва відэа, у якім расейскі Су-24 зьдзяйсьняе бомбавы ўдар. Падчас вызначэньня геалакацыі здымкаў зь відэа каманда InformNapalm выявіла, што мейсцам бамбаваньня зьяўлялася навакольле гораду Abu al-Duhur, якое не кантралюецца баявікамі “Ісламскае Дзяржавы”, супраць якіх РФ абвесьціла правядзеньне вайсковае апэрацыі.

Паводле анлайн-мапы грамадзянскай вайны ў Сірыі, горад Abu al-Duhur і ягонае навакольле ў гэты момант займае апазыцыя і гэта чарговага разу сьведчыць пра тое, што расейская авіяцыя зьдзяйсьняе ўдары не па Ісламскай Дзяржаве, але менавіта па апазыцыі, якая выступае супроць Башара Асада.

Нагадаем, што 5 кастрычніка InformNapalm зьдзейсьніў паглыбленую выведку і выявіў дадзеныя расейскіх пілётаў, якія бамбуюць сірыйскія гарады.

Таксама, напрыканцы верасьня, яшчэ да наданьня дазволу Савета Фэдэрацыі на выкарыстаньне арміі Расеі і пачатку вайсковай апэрацыі ў Сірыі, падчас зьдзяйсьненьня выведкі сацыяльных профіляў расейскіх вайскоўцаў мы выявілі факты, якія дэманструюць падрыхтоўку ВПС РФ да мажлівых правакацыяў з выкарыстаньнем ударнае авіяцыі. Таксама мы вызначылі аэрадром, зь якога адбывалася перакідваньне ўзбраеньня ў Сірыю перад пачаткам вайсковае апэрацыі.

22 верасьня, пасьля публікацыі спадарожнікавых здымкаў, якія дэманструюць значнае нарошчваньне Расеяй вайсковае прысутнасьці ў Сірыі, InformNapalm зьдзейсьніў уласны аналіз фота Су-30СМ з аэрадрома ў Латакіі, і зрабіў высновы пра прыналежнасьць вайсковай авіяцыі да падразьдзяленьняў ВПС Усходняе вайсковае акругі РФ.

15 верасьня, InformNapalm таксама падрыхтаваў маштабны аналіз паставак узбраеньня й тэхнікі ў Сірыю праз мора і прадэманстраваў назьбіраную за 3 гады статыстыку выправаў вялікіх дэсантных караблёў у сірыйскі порт Тартус. Статыстыка асабліва цікавая праз тое, што паказвае сталую дынаміку павялічэньня колькасьці выправаў расейскіх вайсковых караблёў.

Нагадаем, што дастаўка вайсковых грузаў у Сірыю дэсантнымі караблямі ВМФ РФ пачалася ўлетку 2012 году, пасьля інцыдэнту ў Атлантыцы, калі было спыненае расейскае грузавое судна Alaed. У гэтага судна паводле патрабаваньня брытанскага ўраду была адкліканая страхоўка, якую раней выдала кампанія Standard Club. Пасьля рамонту ў РФ, судна мелася даставіць ў Сірыю гэлікоптэры Мі-25 і сыстэмы СПА.

Матар’ял да публікацыі падрыхтаваў Міхаіл Кузьняцоў

(с) Інфармацыя падрыхтаваная адмыслова для сайту InformNapalm.org, падчас перадруку й выкарыстаньня матар’ялу актыўная спасылка на аўтара і наш праэкт абавязковая.

Пераклад Дзяніса Івашына