Збройныя Сілы Расейскае Фэдэрацыі сыстэматычна парушаюць паветраную прастору Украіны, запускаюць выведвальныя бесьпілётныя лятальныя апараты (БПЛА) на ўкраінскую тэрыторыю.

7 тыпаў расейскіх БПЛА

Напрацягу 2014-2017 гг. валянтэры InformNapalm сабралі інфармацыю й доказы выкарыстаньня ЗС РФ супроць Украіны як мінімум 7 тыпаў расейскіх БПЛА. Сярод іх бесьпілётнікі: “Гранат-1”, “Гранат-2”, “Фарпост”, “Элерон-3СВ”, “Застава”, “Тахіён” і “Арлан-10”. Апошняя мадыфікацыя ў сьпісе доказаў фігуруе найбольш часта, бо спэктар выкарыстаньня расейскага шматфункцыянальнага бесьпілётнага комплексу “Арлан-10” досыць шырокі. Зь ягонай дапамогаю можна ня толькі зьдзяйсьняць выведку аб’ектаў і мясцовасьці, але й падаўляць наземныя сродкі сувязі ў якасьці кампанэнту комплексу РЭБ РБ-341В «Леер-3» Збройных Сілаў РФ. Гэты комплекс быў ужо неаднойчы зафіксаваны на акупаванай тэрыторыі Данбаса.

Логі маршрутаў

Валянтэры каманды «Армія SOS» на экслюзіўнай падставе надалі нам доказы шматлікіх парушэньняў паветранае прасторы Украіны з боку РФ. Справаздача валянтэраў грунтуецца на дэшыфраваньні інфармацыі з флэш-памяці расейскага БПЛА “Арлан-10” (бартавы № 10332).

Пазначаны борт 6 лістапада 2016 году разьбіўся непадалёк населенага пункту Мялекіна Мангушскага раёну Данецкае вобласьці ў акваторыі Азоўскага мора. З аналізу логаў палётаў бесьпілётніка вынікае, што з 2014 году зь ягонай дапамогаю неаднаразова была зьдзяйсьненая выведка ўкраінскае тэрыторыі.

Аналіз логаў палётаў

Паводле справаздачы расейскі БПЛА актыўна выкарыстоўвалі з пачатку апэрацыі захопу  Крыма. Таксама зь ягонай дапамогаю зьдзяйсьнялася аэравыведка ў раёне ўкраінскіх населеных пунктаў: Вінаграднае, Прыморскае, Піянэрскае (з  2015 г. гэтыя сёлы часова знаходзяцца ў падпарадкаваньні Марыюпальскай гараздкой рады), Пакроўскае (Мангушскі раён Данецкае вобл.), Калінаўка, Лебядзінскае, Сопіна, Бярдзянскае, Шырокіна (Валнаваскі раён Данецкае вобл.), Сартана, Талакіўка (Кальміюская раённая рада Марыюпалю), Саханка (Наваазоўскі раён Данецкае вобл.) і г. Марыюпаль.

Мейсцамі запуску БПЛА былі пункты, што знаходзяцца ва акупаваным Крыме, а таксама на вайсковых палігонах РФ у Краснадарскім краю і Валгаградзкай вобласьці РФ.

Таксама падаем інфаграфіку, зробленую на падставе базы дадзеных расьледаваньняў InformNapalm пра выяўленыя расейскае ўзбраеньне й вайсковую тэхніку на тэрыторыі акупаванага Данбаса. Графіка таксама даступная на ўкраінскай, расейскай і ангельскай мовах.

Матар’ял да публікацыі падрыхтавалі Міхаіл Кузьняцоў і Раман Бурко адмыслова для сайту міжнароднае выведвальнае супольнасьці InformNapalm.

Пераклаў на беларускую мову Дзяніс Івашын.

Падчас выкарыстаньня інфармацыі актыўная спасылка на крыніцу абавязковая.
(Creative Commons — Attribution 4.0 International — CC BY 4.0 )

Рабіце рэпост і дзяліцеся зь сябрамі.
Падпісвайцеся на старонкі супольнасьці InformNapalm у Фэйсбук / Твітэр / Telegram
і апэратыўна атрымлівайце інфармацыю пра новыя матар’ялы.