У баявых дзеяньнях на Данбасе Расея актыўна выкарыстоўвала й працягвае выкарыстоўваць сродкі радыёэлектроннай барацьбы (РЭБ). Расейскія вайсковыя адмыслоўцы РЭБ актыўна ўдзельнічаюць у забесьпячэньні ўварваньня ЗС РФ на тэрыторыю Украіны: блякуюць лініі сувязі GSM-апэратараў, праз радыёвыпраменьваньне ўзьдзейнічаюць на электронныя сродкі сыстэмаў кіраваньня. Станам на 29 сакавіка 2017 году каманда InformNapalm выявіла на Данбасе 44 тыпы ўзбраеньняў й тэхнікі ЗС РФ, 9 зь якіх – гэта сыстэмы радыёэлектроннай барацьбы: РБ-341В «Леер-3», Р-378Б «Барысаглебск-2», Р-934УМ, Р-330Ж «Житель» (рас.), «Торн», Ртуць-БМ, РБ-636АМ2 «Свет-КУ», 1РЛ243 «Рубікон», Р-381Т2 «Таран».

«Злавіць» адмыслоўца РЭБ больш складана, чымся выведніка

«Злавіць» на Данбасе ў аб’ектыў фотакамэры расейскіх танкістаў, выведнікаў, снайпэраў або артылерыстаў часам значна лягчэй, чымся адмыслоўцаў РЭБ. Іх значна радзей узнагароджваюць мэдалямі й ордэнамі і яны ня ўдзельнічаюць у наўпроставых баявых сутыкненьнях. Толькі выпадкова выкладзеныя фатаздымкі ў сацсетках могуць спрычыніцца да выкрыцьця іхнае дзейнасьці, наступствы якой мы назіраем падчас гэтай вайны. У гэтым OSINT-расьледаваньні мы падаем інфармацыю пра раскрытую намі групу адмыслоўцаў з роты радыёэлектроннай барацьбы 19-й асобнай мотастралковай брыгады (АМСБр) Збройных Сілаў Расейскай Фэдэрацыі (в/ч 20634, дысьлякацыя: г. Уладзікаўказ, Паўночная Асэтыя, ПВА РФ), якія ўлетку-ўвосень 2014 году ў складзе батальённа-тактычнай групы (БТГр) былі перакінутыя да ўкраінскай мяжы для забесьпячэньня ўварваньня расейскай арміі.

Агульны аналіз фотаальбомаў

Аналіз фотаальбомаў пададзеных ніжэй вайскоўцаў роты РЭБ 19-й АМСБр дэманструе, што ў траўні-чэрвені 2014 году гэтае падразьдзяленьне праходзіла перадбаявую падрыхтоўку на палігоне Прудбой Валгаградзкай вобласьці РФ. Да канца чэрвеня 2014 году жаўнераў брыгады перакінулі ў памежны з Украінаю раён Растоўскае вобласьці. Сярод фатаздымкаў маюцца фота, выкладзеныя ў жніўні 2014 году. Большасьць зь іх зробленыя ў лясным лягеры. Падобныя перавалачныя базы расейцаў мы часта фіксавалі зь лета 2014 году. Лягеры ля мяжы з Украінай прызначаюцца для схаванай канцэнтрацыі й далейшага перакідваньня войскаў на Данбас. У фота з палявых лягероў вонкавы выгляд жаўнераў нагадвае больш «партызанаў-апалчэнцаў», чымся кадравых вайскоўцаў, але няхай гэта ня ўводзіць чытача ў зман. Нестатутны вонкавы выгляд – гэта элемэнт мімікрыі гібрыднае расейскае арміі. У фота таксама можна пабачыць малагабарытныя намёты й сылюэты машыны комплексу радыёэлектроннай барацьбы РБ-301Б «Барысаглебск-2». Але пра фігурантаў расьледаваньня й тэхніку распавядзем ніжэй.

Расейскія вайскоўцы роты РЭБ 19-й АМСБр ЗС Расеі

1. Яўген Майсееў

Нарадзіўся 28 лістапада 1992 г. у с. Гусары Уйскага раёну Чалябінскае вобласьці.

У сацыяльных сетках: “VK” (архівы профілю, фотаальбому, кантактаў).

На тэрміновую вайсковую службу рэкрутаваны ўвосень 2013 году. Да моманту звальненьня з войска, увосень 2014 году, меў пасаду кіроўцы другога ўзводу радыёперашкодаў роты радыёэлектроннай барацьбы 19-й АМСБр (пазначаны чырвонаю стрэлкай).

2. Генадзь Сядых

Нарадзіўся 20 лістапада ў пас. Леспрамхоз Мажайскага раёну Маскоўскае вобл. Год нараджэньня – н/д.

У сацыяльных сетках: “VK” (архівы профілю, фотаальбому, кантактаў).

На тэрміновую вайсковую службу рэкрутаваны ўвосень 2013 году. Пасьля шкаленьня ў навучальным цэнтры малодшых спэцыялістаў РЭБ ў Тамбове (в/ч 61460) быў разьмеркаваны ў падразьдзяленьне РЭБ 19-й АМСБр.

Сярод фатаздымкаў Сядых маюцца фота з той жа сэрыі, што і ў фотаальбоме Майсеева – здымкі з жніўня 2014 году – ў якіх зафіксаваная група вайскоўцаў роты РЭБ у перавалачным лягеры інтэрвэнтаў (пазначаны памаранчаваю стрэлкай).

3. Дзьмітры Панкратаў

Нарадзіўся 10 сьнежня ў г. Тамбоў. Год нараджэньня – н/д.

У сацыяльных сетках:  “VK” (архівы профілю, фотаальбому, кантактаў).

На тэрміновую вайсковую службу рэкрутаваны ўвосень 2013 году. Пасьля навучальнага цэнтру малодшых спэцыялістаў РЭБ у Тамбове (в/ч 61460) разьмеркаваны ў падразьдзяленьне РЭБ 19-й АМСБр.

У фотаальбоме Панкратава маецца тая ж сэрыя фота, што і ў Майсеева і Сядых – фатаздымкі – зробленыя ў жніўні 2014 году ў перавалачным лясным лягеры інтэрвэнтаў (пазначаны сіняю стрэлкай).

4. Арцём Варапаеў

Нарадзіўся 6 студзеня ў г. Кемерава. Год нараджэньня – н/д.

У сацыяльных сетках: “VK” (архівы профілю, фотаальбому, кантактаў).

На тэрміновую вайсковую службу рэкрутаваны ўвосень 2013 году, служыў у падразьдзяленьні РЭБ 19-й АМСБр.

У фотаальбоме Варапаева маюцца здымкі з жніўня 2014 году з згаданага вышэй перавалачнага лягеру, а таксама фота, выкладзенае ў лістападзе 2014 году, у якім ён зафіксаваны ў тыповым для расейска-тэрарыстычных сілаў выглядзе “партызана” (пазначаны белаю стрэлкай).

5. Сяргей Далмат

Нарадзіўся 7 верасьня 1993 г. у г. Навакузнецк.

У сацыяльных сетках: “VK” (архівы профілю, фотаальбому, кантактаў).

У фотаальбоме Далмата маюцца здымкі з жніўня 2014 году з пазначанага вышэй перавалачнага лягеру расейскіх інтэрвэнтаў, якія ён выклаў пазьней – у 2015 годзе (фігурант пазначаны зялёнаю стрэлкай).

 

Што нам вядома пра РБ-301Б «Барысаглебск-2»

Паводле дадзеных InformNapalm сродкі сучаснага расейскага комплексу радыёэлектроннага падаўленьня КХ/УКХ-сувязі РБ-301Б «Барысаглебск-2» пачалі масава паступаць ва ўзбраеньне падразьдзяленьняў Паўднёвае вайсковае акругі ЗС РФ з 2013 году. Адную з машынаў комплексу – пункт кіраваньня Р-330КМВ, які перакідваўся з выкарыстаньнем цывільнага транспарту ў Растоўскае вобласьці, – мы зафіксавалі ўлетку 2015 году. У лютым 2015 году гэтыя сродкі РЭБ фіксаваліся ў горадзе Бранка Луганскае вобласьці, а ў сакавіку 2015 году – непасрэдна ў Луганску. У траўні 2016 году InformNapalm апублікаваў матар’ял пра выкарыстаньне расейскай аўтаматызаванай станцыі перашкодаў «Р-378Б» комплексу РЭБ «Барысаглебск-2» на перадавой лініі ў раёне Стаханава 05 лістапада 2014 году.

288 з 418. Дзе астатнія?

Нагадаем пра цікавую асаблівасьць, адлюстраваную ў расьледаваньні што да раскрыцьця складу батальённа-тактычнай групы 7-й вайсковай базы РФ, якая зьдзяйсьняе баявую варту ў Растоўскае вобласьці. З 418 чалавек БТГр 7-й в/б у Растоўскае вобласьці ў штатным забесьпячэньні былі толькі 288 чалавек. То бок, на мейсцы дысьлякацыі зводнага падразьдзяленьня знаходзіліся 288 чалавек, у тым ліку толькі адзін вайсковец з узводу РЭБ. Паводле нашага меркаваньня, астатнія 130 чалавек з складу БТГр знаходзіліся на другім баку мяжы і забясьпечвалі тэрарыстычныя фармаваньні «Л/ДНР», якія на 70% укамплектаваныя расейскімі кадравымі вайскоўцамі й наймітамі з РФ.

Што нам вядома пра 19-ю АМСБр ЗС Расеі

19-я АМСБр ЗС РФ фігуруе ў 8 OSINT-расьледаваньнях InformNapalm. Гэтыя публікацыі зьвязаныя з фактамі ўварваньня ва Украіну ўлетку-ўвосень 2014 году, а таксама доказамі больш позьняга ўдзелу вайскоўцаў гэтае брыгады ў баявых дзеяньнях на Данбасе:

• Баявыя разьлікі РСЗВ «Град» 19-й МСБр, якія «партызаняць» у лясох уздоўж мяжы з Украінай
• САУ «Мста-С» 19-й МСБр з Паўночнае Асэтыі на мяжы з Украінай
• Пра прыгоды роты БПЛА 19-й мотастралковай брыгады ва Украіне
• Вайскоўцы роты снайпэраў 19-й АМСБр ЗС РФ у шэрагах НЗФ «Самалі»
• Курс на агрэсію: у структуры АМСБр ЗС РФ створаныя новыя выведвальныя дэсантныя роты
• Ідэнтыфікацыя вайсковых злачынцаў з 19-й АМСБр ЗС РФ
• Кадравы голад збройных сілаў РФ: ва «ўкраінскіх камандыроўках» выкарыстоўваюць жаўнераў тэрміновай службы

• Данбас: снайпэр Збройных Сілаў РФ у шэрагах «апалчэньня Л/ДНР»

 

[toogle] [toogle_item title = “Склад і ўзбраеньне 19-й АМСБр”]

19-я асобная Варонежска-Шумлінская Красназнамённая ордэнаў Суворава й Працоўнага Чырвонага Сьцяга мотастралковая брыгада, в/ч 20634 (п. Спутнік, Уладзікаўказ) 58-й агульнавайсковай арміі Паўднёвае вайсковае акругі.

Структура: кіраваньне, 1-ы мотастралковы батальён, 2-і мотастралковы батальён, 3-ці мотастралковы батальён, батальён СпН (п. Троіцкае, Інгушэтыя), стралковая рота (снайпэраў), танкавы батальён, 1-ы гаўбічны самаходна-артылерыйскі дывізыён, 2-і гаўбічны самаходна-артылерыйскі дывізыён, рэактыўны артылерыйскі дывізыён, процітанкавы артылерыйскі дывізыён, зэнітны ракетны дывізыён, зэнітны ракетна-артылерыйскі дывізыён, выведвальны батальён, рота БПЛА, інжынэрна-сапёрны батальён, рота РХБА, батальён кіраваньня (сувязі), рота РЭБ, батарэя кіраваньня й артылерыйскай выведкі (начальніка артылерыі), узвод кіраваньня й радыёлякацыйнай выведкі (начальніка супрацьпаветранай абароны), узвод кіраваньня (начальніка выведвальнага аддзяленьня), рамонтна-аднаўленчы батальён, батальён матар’яльнага забесьпячэньня, камэнданцкая рота, мэдычная рота, узвод інструктараў, узвод трэнажэраў, палігон, аркестар.

Узбраеньне: 40 адз. Т-90А, 1 адз. Т-90К, 120 адз. БМП-3, 9 адз. БТР-82А, 27 адз. БТР-80, 6 адз. ГАЗ-233014 СТС «Тыгр», 15 адз. МТ-ЛБ, 18 адз. БМ 2Б17-1 «Тарнада-Г», 36 адз. 152-мм СГ 2С19 «Мста-С», 18 адз. 120-мм мінамётаў 2С12 «Сані», 12 адз. 100-мм гарматаў МТ-12 «Рапіра», 12 адз. самаходных ПТРК 9П149 «Штурм-С», 4 адз. БРДМ-2, 12 адз. БМ 9К330 «Тор», 6 адз. БМ 9А34(35) «Страла-10», 6 адз. ЗСУ 2С6М «Тунгуска», 27 адз. ПЗРК 9К38 «Ігла».

Крыніца: milkavkaz.net

[/toggle_item] [/toggle]

---

Матар’ял да публікацыі падрыхтаваў на падставе ўласнага OSINT-расьледаваньня

 Іраклі Камахідзэ адмыслова для сайту InformNapalm.

 Пераклаў на беларускую мову Дзяніс Івашын.

(CC BY 4.0) Інфармацыя падрыхтаваная адмыслова для сайту InformNapalm.org, падчас поўнага або частковага перадруку й выкарыстаньня матар’ялу наўпроставая спасылка на аўтара і наш праэкт абавязковая.

Падпісвайцеся на старонкі супольнасьці InformNapalm у Фэйсбук / Твітэр і апэратыўна атрымлівайце інфармацыю пра новыя матар’ялы.

Заклікаем чытачоў актыўна пашыраць нашыя публікацыі ў сацыяльных сетках, на форумах і СМІ. Наданьне матар’ялам расьледаваньняў шырокае агалоскі здатнае зьмяніць хаду інфармацыйнага і баявога супрацьстаяньня з Крамлём.