У зьвязку з чарговым парушэньнем рэжыму спыненьня вагню на Данбасе з боку расейскіх наймітаў, а таксама з-за зьдзяйсьненьня ракетна-бомбавых удараў ВКС РФ па грамадзянскіх аб’ектах у Сірыі, Міжнародная валянтэрская супольнасьць InformNapalm працягвае публікаваць дадзеныя, зьвязаныя з афіцыйнай паветранай і неафіцыйнай наземнай апэрацыяй РФ у Сірыі.

Расея, пад прыкрыцьцём лёзунгаў барацьбы з тэрарызмам, працягвае ствараць напружанасьць на Блізкім Усходзе, правакуючы адток уцекачоў у ЭЗ і нагнятаючы сацыяльна-эканамічнае і палітычнае напружаньне ў рэгіёне.

Падчас правядзеньня OSINT-дасьседаваньняў InformNapalm, было зафіксаванае, што супрацоўнікі спэцслужбаў РФ ўсё часьцей спрабуюць схаваць любыя сьляды знаходжаньня расейскіх войскаў за межамі авіябазы «Хмеймім» у Латакіі. Гэта заканамерна, бо функцыянаваньне іншых «сакрэтных» базаў ЗС РФ у Сірыі або баявыя дзеяньні ў іншых сірыйскіх правінцыях выходзяць за межы афіцыйнай пазыцыі Масквы.

У прыватнасьці, наконадні было зафіксаванае раптоўнае выдаленьне пэрсанальнага акаўнта расейскага марскога пяхотніка Аляксандра Сярдзюкова з 336-й асобнай брыгады марской пяхоты БФ РФ, г. Балтыйск, 05.09.1992 г.н., мейсца нараджэньня г.Эліста (архіў 1, архіў 2).

Але архівы, як і “рукапісы” не гараць.

Здавалася б, нічога асаблівага – звычайны марскі пяхотнік-кантрактнік, ахоўвае вайсковую базу ЗС РФ. Аднак падчас больш дэталёвага аналізу інфармацыі што да А.Сярдзюкова, сталі вядомыя вельмі цікавыя падрабязнасьці.

Зьвярніце ўвагу на фота Аляксандра разам з таварышамі ў службе на тле ангару для авіяцыйнай тэхнікі (архіў).

InformNapalm дасьледаваў дадзеныя і прааналізаваў спадарожнікавыя здымкі. Было выяўленае,  што балтыйскія марпехі былі закінутыя вельмі далёка ад Латакіі. Мейсца, дзе было зробленае фота з прывязкай да мясцовасьці можна пабачыць на мапе.

Як бачым, гэта вайсковая авіябаза Khalkhalah на поўдзень ад Дамаска.

Гэтыя дадзеныя чарговага разу сьведчаць пра тое, што расейцы актыўна дзейнічаюць практычна на ўсёй тэрыторыі Сірыі. Напрыклад, знаходжаньне расейцаў на авіябазе ў г.Хама пацьверджваюць дадзеныя іншых крыніцаў (1, 2):

На фота, апроч лятакоў ВПС Сірыі, можна пабачыць расейскія грузавыя вайсковыя лятакі ІЛ-76, якія перакідваюць пад г.Хама жывую сілу, тэхніку і ўзбраеньне.

Нарэшце, падчас ідэнтыфікацыі вайсковай часткі А.Сярдзюкова было вызначанае, што тэрміновую службу ён праходзіў у 58 арміі ЗС РФ (архіў). Затым перайшоў на кантракт у марскую пяхоту (архіў).

На асабістым фота, у якім марпех з таварышамі ў службе зафіксаваныя на новым БТР-82А, добра відаць вядомы знак 336-й АБрМП – «белы дэльфін над морам» (архіў).

Аналягічны знак можна пабачыць і на фатаздымках з афіцыйнай групы 336-й брыгады: 1 і 2. «Белы дэльфін» зьяўляецца афіцыйным сымбалем гэтай вайсковай часткі. Больш за тое, менавіта ва ўзбраеньне 336-й АБрМП ў 2013-2014 гадох былі прынятыя новыя БТР-82А, афарбаваньне якіх адпавядае тэхніцы на вышэйпазначаным фота (напрыклад: артыкул, архіў).

Таксама можаце азнаёміцца ​​зь іншымі матар’яламі Міжнароднае валянтэрскае супольнасьці InformNapalm, у якіх зьдзейсьненыя OSINT-дасьледаваньні неафіцыйнай і невызнанай Масквой сухапутнай вайсковай апэрацыі ЗС РФ у Сірыі:

1. РФ завязла ў сухапутнай апэрацыі ў Сірыі. Расейскія вайскоўцы ў правінцыі Хама;
2. У сірыйскую камандыроўку толькі з службовым пашпартам. 28-я АМСБр ЗС РФ у Сірыі;
3. Міністар абароны Расеі Шайгу выправіў у Сірыю сваіх зямлякоў;
4. Расея пачала замаскаваную наземную апэрацю ў Сірыі;
5. Берагавыя войскі ЧФ РФ рыхтуюцца да «пазазямной апэрацыі» ў Сірыі;

А таксама шматлікія іншыя OSINT-дасьледаваньні InformNapalm што да Сірыі.

Матар’ял да публікацыі падрыхтавалі Мікалай Махно і Міхаіл Кузьняцоў

Пераклаў на беларускую мову Дзяніс Івашын

 (CC BY 4.0) Інфармацыя падрыхтаваная адмыслова для сайту InformNapalm.org, падчас поўнага або частковага перадруку й выкарыстаньня матар’ялу наўпроставая спасылка на аўтара і наш праэкт абавязковая.