Міжнародная выведвальная супольнасьць InformNapalm у лістападзе 2017 году атрымала для аналізу выпісы з загадаў камандаваньня некалькіх вайсковых частак расейскае арміі, у якіх фігуруе больш за 1000 вайскоўцаў. Усе яны былі выпраўленыя для выкананьня баявых задачаў, зьвязаных з захопам украінскага Крыма ў сакавіку 2014 году. У сьпісах маюцца поўныя імёны й прозьвішчы, званьні й пасады жаўнераў, сяржантаў, старшынаў і афіцэраў, а таксама пазначаны пэрыяд іхнага камандыраваньня.

Выходныя электронныя копіі дакумантаў нададзеныя нам актывістамі Украінскага Кібэральянса.

Вэрыфікацыя й пашырэньне дадзеных

Валянтэры InformNapalm зьдзяйсьняюць вэрыфікацыю першаснае інфармацыі праз выведку адкрытых крыніцаў (OSINT), на гэты момант сьпісы не апрацаваныя ў поўным аб’ёме, але ўжо зараз можна сьцьвярджаць, што яны сапраўдныя. Поўная аналітычная справаздача пра аналіз доказаў, параўнальныя характарыстыкі й статыстычныя дадзеныя будуць пададзеныя пазьней.

Характэрна, што шматлікія фігуранты з «крымскіх сьпісаў» былі потым выпраўленыя для ўдзелу ў баявых дзеяньнях супроць Украіны на Данбасе.

У гэтай публікацыі мы падаем доказы ўдзелу двух кадравых вайскоўцаў 18-й асобнай мотастралковай брыгады (в/ч 27777, пункт сталай дысьлякацыі Ханкала / Калінаўская, з 2017 году перафармаваная ў 71-ы МСП адноўленай 42-й дывізіі) Паўднёвае вайсковае акругі ЗС РФ у вайне супроць Украіны.

Цякужэў Асланбі Русланавіч

Нарадзіўся 14 лістапада 1987 г. у г. Аргун, Чачэнія. Станам  на 2014 год меў пасаду камандыра аўтамабільнага аддзяленьня ўзводу забесьпячэньня камэнданцкае роты 18-й АМСБр. Вайсковае званьне ў выпісу з загаду станам на 2014 год – «старшына».

Выяўленыя акаўнты сацсетак: “ОK” (архівы профілю, фотаальбому, кантактаў); “VK” №1 і №2 – неактыўныя.

У фотаальбоме Цякужэва была знойдзеная сэрыя фатаздымкаў, якія ён выклаў 20-31 жніўня 2014 году. Асабліва цікавым ёсьць фота захопленага аўтамабілю «Хамэр», на якім можна пабачыць характэрны белы пас і знак аэрамабільных войскаў ЗСУ. Таксама цікавымі зьяўляюцца групавыя здымкі людзей з зброяй і зь белымі ідэнтыфікацыйнымі павязкамі «свой-чужы», якія актыўна выкарыстоўваюць расейскія вайскоўцы й найміты з расейскіх прыватных вайсковых кампаніяў на Данбасе.

Да аднога з фатаздымкаў маецца камэнтар таварыша ў службе Цякужэва: «С ротным че» (рас.). Зь ягонай дапамогаю мы вызначылі акаўнт афіцэра гэтага ж злучэньня, імя якога таксама фігуруе ў крымскіх выпісах з загадаў. Згодна зь сьведчаньнямі, што маюцца ў ягоным акаўнце, ён таксама ўдзельнічаў у баявых дзеяньнях на Данбасе.

Фота з пашкоджаным аўтамабілем Humvee зробленае на КПП «Марынаўка» (Шахтарскі раён Данецкае вобласьці, Украіна). Для параўнання глядзіце відэасюжэт.

Але выпісы з загадаў і акаўнт сацсеціва – гэта не адзінае пацьверджаньне таго, што Асланбі Цякужэў – кадравы расейскі вайсковец. Ягоныя дадзеныя таксама фігуруюць у апэляцыйным вызначэньні судовае калегіі ў крымінальных справах Паўночна-Каўказскага акруговага вайсковага суду № 22А-291/2017 з 10 жніўня 2017 году.

Згодна з гэтым дакумантам, выкладзеным у адкрытым доступе, Цякужэў прызнаны вінаватым у махлярстве, менавіта – ў крадзяжы чужой маёмасьці праз падман. Праз выкарыстаньне свайго службовага становішча Цякужэў узяў 4 000 руб. у аднаго з таварышаў у службе нібыта дзеля набыцьця акумулятарнае батарэі для службовага аўтамабілю. Аднак акумулятарную батарэю засуджаны старшына гэтак і не набыў, а атрыманыя грошы прысабечыў.

Япішын Яўген Валер’евіч

Нарадзіўся 24 красавіка 1985 г. у г. Улан-Удэ, Бурація. Выпускнік Далёкаўсходняе вышэйшае агульнавайсковае каманднае вучэльні. Станам на 2014 год меў пасаду камандыра камэнданцкае роты 18-й АМСБр, званьне – «капітан». Зь ліпеня 2016 году мае званьне «маёр», у гэты час служыць у складзе 100-й асобнай выведвальнай брыгады так званай экспэрымэнтальнай у г. Маздок, Паўночная Асэтыя.

Акаўнты сацсеціва “VK”: №1 (архівы профілю, фотаальбому, кантактаў), №2 (архівы профілю, фотаальбому, кантактаў) профіль неактыўны з 2013 году.

Яўген Япішын быў апазнаны ў групавых здымках (1, 2) з фотаальбому Цякужэва.

Нагадваем, што іншыя расейскія кадравыя вайскоўцы з 18-й АМСБр ЗС РФ фігуруюць таксама ў дзевяці іншых расьледаваньнях супольнасьці InformNapalm:

• Нацыянальныя батальёны з складу Паўднёвае вайсковае акругі, якія ўдзельнічаюць у баявых дзеяньнях ва Украіне
• Пра расейскі сьлед і “ГРАД” зь яснага неба…
• Танкі 18-й асобнай мотастралковай брыгады з Чачэніі ва Украіне
• Як Павал Губараў “засьвяціў” 18-ю гв. АМСБр ЗС РФ
• «11 сяброў Пуціна»: сэлфі-выведнікі 18-й АМСБр на Данбасе
• Тры камандыроўкі на Данбас з 18-й АМСБр РФ: “Cherchez la femme”
• Удзел РСЗВ 18-й АМСБр ЗС Расеі ў абстрэлах Украіны. Фотафакты і геалякацыя
• Чарговы ўлоў InformNapalm: вайсковыя злачынцы з 18-й АМСБр ЗС РФ
• Афіцэры й жаўнеры рэактыўнага дывізыёну 18-й АМСБр з Чачэніі ад Крыма да Данбаса

Матар’ял да публікацыі падрыхтавалі Іраклі Камахідзэ і ВА адмыслова для сайту міжнароднае выведвальнае супольнасьці InformNapalm.

Пераклаў на беларускую мову Дзяніс Івашын.

Падчас выкарыстаньня інфармацыі актыўная спасылка на крыніцу абавязковая.
(Creative Commons — Attribution 4.0 International — CC BY 4.0 )

Рабіце рэпост і дзяліцеся зь сябрамі.
Падпісвайцеся на старонкі супольнасьці InformNapalm у Фэйсбук / Твітэр / Telegram
і апэратыўна атрымлівайце інфармацыю пра новыя матар’ялы.