Віншуем з Раством Хрыстовым і Новым Годам!

Напрыканцы й пачатку новага году ёсць традыцыяй узгадваць пра свае вынікі й дасягненьні, пляны на будучыню. Чарговы год прайшоў у барацьбе й значным інфармацыйным супрацьстаяньні з Расейскай Фэдэрацыяй, якая досыць актыўна пачала выкарыстоўваць для сваіх інфармацыйна-псыхалягічных апэрацыяў і Беларусь. Барацьба абвастрылася, выразна паказала расклад сілаў і галоўных актараў.

Адною зь сілаў, якая надзейна трымае фронт інфармацыйнае абароны, зьяўляецца нашая супольнасьць InformNapalm, а менавіта валянтэры й актывісты з Украіны й Беларусі, Нямеччыны й Грузіі, Швэцыі й Баўгарыі, Чэхіі й Польшчы, Турэччыны, ЗША, Францыі і шматлікіх іншых краінаў.

Мы размаўляем на розных мовах, жывем за тысячы кілямэтраў адзін ад аднаго, у нас розныя рэлігійныя перакананьні, але нас аб’ядноўвае моцная прага справядлівасьці й жаданьне спыніць агрэсію Расеі. І на працягу 2017 году мы зрабілі насамрэч шмат.

Зьдзейсьнілі 313 новых расьледаваньняў, у выніку якіх сабралі пераканаўчыя доказы расейскае агрэсіі супроць Украіны, Грузіі й Сірыі. Пашырылі 2470 перакладаў на разнастайных мовах. Вызначылі дадактова 11 з 44 тыпаў найноўшага расейскага ўзбраеньня на Данбасе, выявілі 8 вайсковых частак, што ўваходзяць у агульную колькасьць ідэнтыфікаваных намі на сёньня ўжо 83 (!) вайсковых фармаваньняў ЗС РФ, перакінутых на Данбас для ўдзелу ў баявых дзеяньнях супроць Украіны.

Мы зазналі посьпехі ў стратэгічнай камунікацыі й няпублічнай дыпляматыі. Выступалі на міжнародных форумах, канфэрэнцыях што да бясьпекі ў Эстоніі й Летуве, прадстаўлялі матар’ялы нашых дасьледаваньняў у ЗША й Нямеччыне. Зьдзейсьнілі больш за 120 сустрэчаў з журналістамі, экспэртамі й дыпляматамі. На InformNapalm спасылаліся тысячы публікацыяў у СМІ. Нашыя даклады дэманстраваліся падчас сэсіяў Парляманцкай Асамблеі АБСЭ й былі далучаныя да пазову Украіны супроць Расеі ў Эўрапейскім судзе ў правох чалавека. На працягу году мы пасьпяхова супрацьдзейнічалі інфармацыйным апэрацыям Крамля й публікавалі неабвержныя доказы расейскай агрэсіі.

Дзякуючы дзейнасьці нашай супольнасьці й дапамозе з боку “Украінскага Кібэральянса” у значнай ступені была нэйтралізаваная падрыўная дзейнасьць грамадзяніна Беларусі Аляксандра Усоўскага, які за шчодрае фінансаваньне з боку расейскіх структураў арганізоўваў антыўкраінскія акцыі ў Польшчы й намагаўся быць правадніком расейскіх інтарэсаў у краінах Сярэдняе Эўропы.

Мы аднымі зь першых пачалі надаваць інфармацыю пра адкрыцьцё з боку афійцыйных уладаў Беларусі паўнавартаснага інфармацыйнага фронту супроць Украіны, які ўцягнуў нашую краіну ў вір супрацьстаяньня на баку дзяржавы-агрэсара – Расейскай Фэдэрацыі, – і які цалкам нівэляваў статус Беларусі, так званага донару міжрэгіянальнае бясьпекі.

Мы актыўна асьвятлялі падзеі “гарачай” зімы й вясны 2017 году ў Беларусі, выкрывалі пагрозы выкарыстаньня народных пратэстаў разнастайнымі дэструктыўнымі сіламі. Адкрыта падавалі інфармацыю пра фабрыкацыю так званай справы “Белага Легіёна“. 25 сакавіка 2017 году ў Менску падчас асьвятленьня мірнае акцыі дэмакратычнае супольнасьці Беларусі “Дзень Волі” й выкананьня прафэсійных журналісцкіх абавязкаў быў незаконна затрыманы й засуджаны да 5 содняў арышту рэдактар беларускае службы InformNapalm Дзяніс Івашын. Зьняволеньне разам з сотнямі іншых незаконна арыштаваных ён адбываў у ЦІП на вул. Акрэсьціна.

Значным журналісцкім расьледаваньнем 2017 году сталася праца беларускае службы InformNapalm пра выкрыцьцё ў шэрагах праваахоўных ворганах Беларусі экс-супрацоўнікаў украінскага спэцпадразьдзяленьня “Бэркут”, якія непасрэдна ўдзельнічалі ў сілавым супрацьстаяньні падчас падзеяў на Майдане ў 2013-2014 гг. і якія пасьля перамогі Рэвалюцыі Годнасьці ўцяклі ў Беларусь. У нашай краіне яны працягваюць службу аўтарытарнаму, але ўжо іншаму рэжыму, асабіста ўдзельнічаюць у затрыманьнях грамадзкіх актывістаў і ілжэсьведчаць падчас судовых працэсаў.

У верасьні 2017 году разам зь інфармацыйным праэктам 1863x.com мы зьдзяйсьнялі  маніторынг расейска-беларускіх супольных стратэгічных вышкалаў “Запад-2017”. Нашая супольнасьць вызначыла большую частку падразьдзяленьняў Збройных Сілаў РФ, перакінутых на тэрыторыю Беларусі, іхны колькасны склад, дысьлякацыю. Былі выяўленыя наўпроставыя пагрозы для Беларусі, якія паўсталі ў выніку правядзеньня гэтых вышкалаў.

Адной з цэнтральных інфармацыйных падзеяў 2017 году безумоўна сталася публікацыя вынікаў маніторынгу што да дамінаваньня ў вышэйшым вайскова-палітычным кіраўніцтве Беларусі службоўцаў, тым ці іншым чынам зьвязаных з Расейскай Фэдэрацыяй. Чытачу было нададзенае права асабіста вызначыць ці зьяўляюцца яны патэнцыйнымі агентамі ўплыву РФ. Праз публікацыю маніторынга быў значна актывізаваны дыскурс пра наяўнасьць сярод вышэйшых афіцэраў МА, МУС і іншых сілавых структураў Беларусі ўдзельнікаў ваенных дзеяньняў у складзе расейскіх падразьдзяленьняў і кавалераў ведамасных узнагродаў Расейскай Фэдэрацыі; пра праблематыку накіраваньня шматлікіх курсантаў, вайскоўцаў на навучаньне ў Расейскую Фэдэрацыю пры функцыянаваньні паўнавартаснае вайсковае адукацыйнае базы ў Беларусі.

У новым, 2018 годзе, будзе працягнутая актыўная дзейнасьць нашае супольнасьці, будуць праведзеныя новыя расьледаваньні й апублікаваныя рэзанасныя матар’ялы. Барацьба трывае й для агульнай перамогі патрэбныя яшчэ вельмі шмат высілкаў і намаганьняў. Кожны з вас можа далучыцца да нашай супольнасьці і стаць часткаю каманды InformNapalm,  зьдзяйсьняць мэты й задачы ў абароне нацыянальных інтарэсаў, дзейна выяўляць і супрацьстаяць пагрозам нацыянальнай бясьпекі. Разам мы здатныя дасягнуць большага, няхай Новы 2018 год наблізіць нашую агульную перамогу!

Падчас выкарыстаньня інфармацыі актыўная спасылка на крыніцу абавязковая.
(Creative Commons — Attribution 4.0 International — CC BY 4.0 )

Рабіце рэпост і дзяліцеся зь сябрамі.
Падпісвайцеся на старонкі супольнасьці InformNapalm у Фэйсбук / Твітэр / Telegram
і апэратыўна атрымлівайце інфармацыю пра новыя матар’ялы.