На Данбасе працягваецца пазыцыйная вайна ўкраінскае арміі з падразьдзяленьнямі армейскіх акупацыйных карпусоў Збройных Сілаў РФ. Усё часьцей з зоны баявых дзеяньняў надыходзяць паведамленьні пра гібель украінскіх вайскоўцаў і добраахвотнікаў ад вагню варожых снайпэраў. Міжнародная валянтэрская супольнасьць InformNapalm працягвае зьдзяйсьняць выведку адкрытых крыніцаў і зьбіраць інфармацыю пра грамадзянаў Расейскай Фэдэрацыі – кадравых вайскоўцаў, якія выконваюць баявыя задачы на ўкраінскім Данбасе. Выяўляць снайпэраў у адкрытых крыніцах досыць складана, аднак і яны патрапляюць у поле зроку валянтэраў-выведнікаў.

27 сакавіка 2018 ад кулі снайпэру загінуў 19-гадовы юнак, баец Добраахвотнага ўкраінскага корпусу “Правага Сэктара” Андрэй Крывіч з пазыўным “Дзілі”. Гэта чарговая вялікая страта ў барацьбе з расейскім агрэсарам, таму варта зьвярнуць увагу на абвастрэньне пазыцыйнай вайны на Данбасе, у якой снайпэры зьяўляецца адной з самых небясьпечных баявых адзінак.

Снайпэрскія пары агрэсара вельмі часта складаюцца, як з кадравых вайскоўцаў ЗС РФ, гэтак і з наймітаў, якія прайшлі адпаведную падрыхтоўку ў расейскіх вайсковых лягерох. Аднак сьлед адрозьніваць “снайпэраў” для прапаганды й снайпэраў, якія выконваюць сапраўдныя баявыя задачы. Абедзьве гэтыя катэгорыі небясьпечныя й граюць важную ролю ў гібрыднай вайне.

Снайпэры для прапаганды

Маецца некалькі вядомых наймітаў, якія выконваюць ролю снайпэраў для расейскай прапаганды. Напрыклад, сэрбскі вярбоўнік Дэян Бэрыч (“Дэкі”). Ён увесь час у кадры прапагандысцкіх сюжэтаў Масквы й грае ролю прыкрыцьця й адцягвае ўвагу ад наяўнасьці кадравых расейскіх вайскоўцаў на Данбасе. З чатырох незалежных кампэтэнтных крыніцаў у Сэрбіі мы атрымалі інфармацыю пра тое, што Бэрыч нібыта зьяўляецца толькі вярбоўнікам і прапагандыстам, сапраўдныя баявыя задачы выконваюць іншыя найміты, а ён толькі здымаецца ў сюжэтах. Ён патрэбны для дэзынфармацыі й адцягненьня ўвагі. Гэта папулярны мэдыйны пэрсанаж. Такімі ж мэдыйнымі фігурамі былі баявікі “Гіві” й “Матарола”, якіх ліквідавалі праз тое, што яны загуляліся ў аўтарытэтных правадыроў і яны сталі больш не патрэбнымі Маскве. Мэдыя-актыўнасьць сэрбскага “снайпэра” – гэта выдатны прыклад спалучэньня вайсковай прапаганды й дэзынфармацыі.

На гэтым фоне знайсьці праз сацыяльныя сеткі сапраўдных баявых снайпэраў досыць складана, аднак часам і яны робяць памылкі й патрапляюць у кадры.

Чытайце таксама: “На акупаваную тэрыторыю прыбывае група расейскіх снайпэраў”

Снайпэры для баявых задачаў

У 2015 годзе мы зафіксавалі вайскоўцаў роты снайпэраў 19-й асобнай мотастралковай брыгады ЗС РФ, якія былі прыкамандыраваныя да бандфармаваньня “Самалі”. У 2016 годзе тэлефанавалі зьбегламу камандыру роты, які ўцёк і пакінуў свайго падначаленага снайпэра, грамадзяніна РФ Галкіна Аляксандра, ліквідаванага на Сьветладраскай дузе. У 2017 годзе зафіксавалі снайпэра таксама з 19-й АМСБр ЗС РФ, які маскаваўся пад «апалчэньне наваросііі» на Данбасе.

Чытайце таксама: “Новыя доказы паставак расейскага снайпэрскага ўзбраеньня на Данбас (Фотафакт)”

Геаграфія прыцягненьня расейскіх вайсковых снайпэраў для вайны на Данбасе пашыраецца. З кастрычніка 2017 г. мы назіралі за прыбыцьцём з РФ яшчэ адной групы снайпэраў, у якую ўваходзіў расейскі вайсковец Юры Пятроў.

Ідэнтыфікацыйныя дадзеныя:

Пятроў Юры Дзьмітрыевіч.

Нарадзіўся 19 красавіка, год нараджэньня – н/д. Сталае мейсца жыхарства: г. Якуцк.

Вайсковец-кантрактнік ЗС РФ, снайпэр.

Тэлефон: +79243669068.

Акаўнт у сацсеціве «VK» (архіў акаўнту, кантактаў, фотаальбому).

У выніку аналізу ягонага акаўнту вызначанае, што з 2013 году ён праходзіў службу ў 40-й асобнай брыгадзе марской пяхоты ЗС РФ (в/ч 10103) і на гэты момант, верагодна, зьяўляецца кантрактнікам гэтай жа вайсковай часткі. У профілі сацсеткі ён не прыхоўвае, што зьяўляецца вайскоўцам паводле кантракту.

У кастрычніку 2017 году ён быў зафіксаваны ў супольных фота зь іншым снайпэрам-наймітам, грамадзянінам РФ з Санкт-Пецярбурга, які ў сацсетках мае старонку зь імем Сяргей Жураўлёў (мажліва псэўданім; архіў акаўнту, кантактаў, фотаальбому). Яны фатаграфаваліся разам на базе 7-й АМСБр 2-га акупацыйнага армейскага корпусу (г. Луганск) 8-й агульнавайсковай арміі ЗС РФ.

Таксама Юры Пятроў зафіксаваны і ў іншых групавых фота снайпэраў. У сацсетках выкладзеныя фота прыбыцьця гэтай снайпэрскай роты на Данбас.

3 студзеня 2018 г. ён выклаў фота квіткоў, на якіх пазначанае, што ён вылятаў зь міжнароднага аэрапорту «Платаў» Растова-на-Доне ў аэрапорт «Дамадзедава» ў Маскве, і ляцеў далей у Якуцк. Там ён, верагодна, праводзіў свой адпачынак пасьля ратацыі на Данбасе.

Гэта далёка не адзіны, але досыць паказальны пэрсанаж, які патрапіў у поле зроку выведнікаў. Расейская прапаганда чацьверты год спрабуе падаваць вайну на Данбасе як унутрыўкраінскі грамадзянскі канфлікт, аднак нягледзячы на ​​ўзмоцнены кантроль за разгалошваньнем інфармацыі ў ЗС РФ, у сацыяльныя сеткі працягваюць трапляць доказы расейскае агрэсіі.

Міжнародная выведвальная супольнасьць InformNapalm зьдзейсьніла ўжо больш за 1800 расьледаваньняў, падчас якіх зафіксавала ўдзел у вайне на Данбасе больш за 1300 кадравых расейскіх вайскоўцаў з 83 вайсковых падразьдзяленьняў. Геаграфія базаваньня гэтых падразьдзяленьняў ахоплівае ўсю тэрыторыю РФ. У красавіку 2018 году мы плянуем падаць  інтэрактыўную базу дадзеных сыстэматызацыі сабранай за 4 гады інфармацыі з доказамі расейскае агрэсіі.

Матар’ял да публікацыі падрыхтаваў Андрэй Лісіцын адмыслова для сайту міжнароднае выведвальнае супольнасьці InformNapalm.

Рэдагаваў і пераклаў на беларускую мову Дзяніс Івашын.

Падчас выкарыстаньня інфармацыі актыўная спасылка на крыніцу абавязковая.
(Creative Commons — Attribution 4.0 International — CC BY 4.0 )

Рабіце рэпост і дзяліцеся зь сябрамі.
Падпісвайцеся на старонкі супольнасьці InformNapalm у Фэйсбук / Твітэр / Telegram
і апэратыўна атрымлівайце інфармацыю пра новыя матар’ялы.