Адною з найважнейшых крыніцаў інфармацыі падчас зьдзяйсьненьня выведкі адкрытых крыніцаў (OSINT) зьяўляюцца профілі сацыяльных сетак расейскіх вайскоўцаў. За тры гады дзейнасьці міжнароднае выведвальнае супольнасьці InformNapalm адпрацаваная ўласная практычная мэтодыка, якая дазваляе дакладна й апэратыўна выяўляць і апазнаваць расейскіх вайсковых злачынцаў. Ідэнтыфікацыя «ветэранаў» Данбаса й Сірыі зьдзяйсьняецца паводле характэрных чыньнікаў. Нават у выпадку выкарыстаньня псэўданімаў і падачы мінімуму асабістае інфармацыі, у большасьці выпадкаў нам удаецца дакладна вызначыць асобы акупантаў.

Адным з галоўных індыкатараў датычнасьці расейскіх вайскоўцаў да ўдзелу ў войнах, распачатых Крамлём супроць Украіны і сірыйскага народу, зьяўляюцца баявыя ўзнагароды. Гэта дзяржаўныя і ведамасныя ордэны і мэдалі РФ, а таксама ўзнагародныя рэестравыя пасьведчаньні да іх, фатаздымкі якіх з гонарам выкладаваюць на сваіх старонках «кавалеры» або чальцы іхных сем’яў.

Да пачатку гібрыднае вайны РФ супроць Украіны некаторыя дадзеныя пра ўзнагароды вайскоўцаў расейскае арміі й матар’ялы рэестраў знаходзіліся ў адкрытым доступе. Але з 2014 году вайскова-палітычнае кіраўніцтва РФ зрабіла гэтую інфармацыю закрытай.

З гэтае прычыны збор зьвестак пра ўзнагароджаных за вайсковыя злачынствы зьяўляецца адным з важных напрамкаў выведкі адкрытых крыніцаў: сацыяльных профіляў, форумаў і г.д. У кастрычніку 2016 году InformNapalm прэзэнтаваў базу дадзеных “Патаўраваныя вайсковыя злачынцы Збройных Сілаў РФ” зь відэа/інфаграфікай. У базу патрапілі 79 «кавалераў», узнагароджаных 10 тыпамі ордэнаў і мэдалёў. Праца ў гэтым накірунку працягваецца, неўзабаве будзе апублікаваная абноўленая база, у якую будуць дададзеныя больш за 60 расейскіх жаўнераў.

У новым OSINT-расьледаваньні падаецца інфармацыя пра вайскоўцаў 19-й асобнай мотастралковай брыгады (в/ч 20634, п. Спутнік, Уладзікаўказ, Паўночная Асэтыя) 58-й агульнавайсковай арміі Паўднёвае вайсковае акругі, якія атрымалі баявыя ўзнагароды за ўдзел у вайне супроць Украіны.

1. Вячаслаў Аляксандравіч Стрэльнікаў

Нарадзіўся 2 чэрвеня 1993 году (паводле іншых дадзеных 22 сакавіка 1989 г.). Родам з пас. Данаўрава Уржумскага раёну Кіраўскае вобласьці.

З аналізу старонкі В. Стрэльнікава вынікае, што тэрміновую вайсковую службу ён праходзіў у 2013-2014 гадох, меркавана, у рэактыўным дывізыёне 19-й мотастралковай брыгады. Пасьля заканчэньня тэрміновае службы падпісаў кантракт у гэтым жа злучэньні з Уладзікаўказа, але ўжо ў складзе выведвальнага батальёну.

В. Стрэльнікаў паводзіць сябе ў сацыяльных сетках досыць асьцярожна, мае профілі з прыдуманымі імёнамі: «VK» №1 “Вячаслаў Талмачоў” (архівы профілю, фотаальбому, кантактаў); «VK» №2 “Артур Самохін” (архівы профілю, фотаальбому, кантактаў); «VK» №3 зь ягоным уласным імем, але гэтая старонка неактыўныя з 2010 году. Стрэльнікаў не стрываў і пахваліўся сваёй высокай баявой узнагародай «Ордэнам Мужнасьці», зь якім ён упершыню пазаваў у фота, выкладзеным у ліпені 2015 году ў профілі зь імем А. Самохін, другога разу ў кастрычніку 2016 году ён выклаў фатаздымак ордэну і копіі ўзнагароднага пасьведчаньня (узнагарода №76983, выдадзеная паводле ўказу прэзыдэнта РФ з 20 студзеня 2015 году) у профілі зь імем В. Талмачоў.

Апроч узнагароды ў профілях В. Стрэльнікава няшмат сьведчаньняў пра ягоныя «баявыя заслугі» і вайсковую службу. Скептыкі могуць сказаць, што гэта ўскоснае пацьверджаньне, аднак празьмерная (і бязглуздая) кансьпірацыя Стрэльнікава-Самохіна-Талмачова сьведчыць пра тое, што яму ёсць што хаваць. А ягоныя сяброўскія кантакты сьведчаць пра службу ў выведцы 19-й АМСБр, сярод якіх ёсць шэраг вайскоўцаў, якія ваявалі на Данбасе, у тым ліку яшчэ адзін узнагароджаны – фігурант №2 Петухоў.

2. Яўген Юр’евіч Петухоў

Нарадзіўся 25 жніўня 1992 г. Родам з г. Волжск, Рэспубліка Марый Эл.

З аналізу старонкі Я. Петухова вынікае, што тэрміновую вайсковую службу ён праходзіў у 2012-2013 гадох, быў кіроўцам камэнданцкае роты 19-й мотастралковае брыгады. Пасьля заканчэньня тэрміновае службы атрымаў добрую службовую характарыстыку і прайшоўшы мэдычнае асьведчаньне, падпісаў кантракт на службу ў гэтым жа злучэньні з Уладзікаўказа на пасаду камандыра аддзяленьня вагнямётнага ўзводу роты РХБА.

Яўген Петухоў досыць актыўны на сваёй старонцы «VK» (архівы профілю, фотаальбому, кантактаў). 3 сьнежня 2014 году ён пахваліўся ўзнагародай – мэдалём «За вайсковую доблесьць» і узнагародным пасьведчаньнем да яго (узнагарода выдадзеная паводле загаду МА РФ №677 2 кастрычніка 2014 г., пасьведчаньне падпісанае часова выконваючым абавязкі камандыра в/ч 20634 падпалкоўнікам Д. Кіршыным). Крыху раней, у верасьні 2014 году, у сваім фотаальбоме ён выклаў фота, у якім паводле стылю адзеньня ён больш падобны да баявіка бандфармаваньняў «Л/ДНР», чымся да кадравага вайскоўца.

Гэта ня першыя і не апошнія вайсковыя злачынцы з складу 19-й АМСБр ЗС РФ. Раней валянтэры супольнасьці InformNapalm ідэнтыфікавалі вайскоўцаў падразьдзяленьняў снайпэраў, РЭБ і БПЛА, якія прымалі ўдзел у вайне на Данбасе.

Даведка па склад і ўзбраеньне 19-й АМСБ

19-я асобная Варонежска-Шумлінская Красназнамённая ордэнаў Суворава й Працоўнага Чырвонага Сьцяга мотастралковая брыгада, в/ч 20634 (п. Спутнік, Уладзікаўказ) 58-й агульнавайсковай арміі Паўднёвае вайсковае акругі.

Станам на 2012-2015 гады камандырам 19-й АМСБр быў генэрал-маёр Кісель Сяргей Аляксандравіч. У верасьні 2016 году Кісель прызначаны на пасаду начальніка штаба 20-й гвардзейскай агульнавайсковай арміі. Званьне генэрал-маёра атрымаў у чэрвені 2013 году.

З 2015 году камандырам 19-й брыгады зьяўляецца палкоўнік Абачэў Эседула Абдулмумінавіч.

Структура: кіраваньне, 3 мотастралковыя батальёны, батальён СпН (п. Троіцкае, Інгушэтыя), стралковая рота снайпэраў, танкавы батальён, 1-ы гаўбічны самаходна-артылерыйскі дывізыён, 2-і гаўбічны самаходна-артылерыйскі дывізыён, рэактыўны артылерыйскі дывізыён, процітанкавы артылерыйскі дывізыён, зэнітны ракетны дывізыён, зэнітны ракетна-артылерыйскі дывізыён, выведвальны батальён, рота БПЛА, інжынэрна-сапёрны батальён, рота РХБА, батальён кіраваньня (сувязі), рота РЭБ, батарэя кіраваньня й артылерыйскай выведкі, узводы кіраваньня начальніка СПА і выведкі, рамонтна-аднаўленчы батальён, батальён матар’яльнага забесьпячэньня, камэнданцкая рота, мэдычная рота, узвод інструктараў, узвод трэнажэраў, палігон, аркестар.

Узбраеньне: 40 адз. Т-90А, 1 адз. Т-90К, 120 адз. БМП-3, 9 адз. БТР-82А, 27 адз. БТР-80, 6 адз. ГАЗ-233014 СТС «Тыгр», 15 адз. МТ-ЛБ, 18 адз. БМ 2Б17-1 «Тарнада-Г», 36 адз. 152-мм СГ 2С19 «Мста-С», 18 адз. 120-мм мінамётаў 2С12 «Сані», 12 адз. 100-мм гарматаў МТ-12 «Рапіра», 12 адз. самаходных ПТРК 9П149 «Штурм-С», 4 адз. БРДМ-2, 12 адз. БМ 9К330 «Тор», 6 адз. БМ 9А34(35) «Страла-10», 6 адз. ЗСУ 2С6М «Тунгуска», 27 адз. ПЗРК 9К38 «Ігла».

19-я АМСБр ЗС РФ фігуруе ў 9 OSINT-расьледаваньнях InformNapalm. Гэтыя публікацыі зьвязаныя з фактамі ўварваньня ва Украіну ўлетку – ўвосень 2014 году, а таксама доказамі больш позьняга ўдзелу вайскоўцаў гэтае брыгады ў вайне на Данбасе:

• Баявыя разьлікі РСЗВ «Град» 19-й МСБр, якія «партызаняць» у лясох уздоўж мяжы з Украінай
• САУ «Мста-С» 19-й МСБр з Паўночнае Асэтыі на мяжы з Украінай
• Пра прыгоды роты БПЛА 19-й мотастралковай брыгады ва Украіне
• Вайскоўцы роты снайпэраў 19-й АМСБр ЗС РФ у шэрагах НЗФ «Самалі»
• Курс на агрэсію: у структуры АМСБр ЗС РФ створаныя новыя выведвальныя дэсантныя роты
• Ідэнтыфікацыя вайсковых злачынцаў з 19-й АМСБр ЗС РФ
• Кадравы голад збройных сілаў РФ: ва «ўкраінскіх камандыроўках» выкарыстоўваюць жаўнераў тэрміновай службы

• Данбас: снайпэр Збройных Сілаў РФ у шэрагах «апалчэньня Л/ДНР»
• Выяўленыя адмыслоўцы радыёэлектроннай барацьбы 19-й АМСБр Збройных Сілаў РФ

Матар’ял да публікацыі падрыхтаваў на падставе ўласнага OSINT-расьледаваньня Іраклі Камахідзэ адмыслова для сайту InformNapalm.

Пераклаў на беларускую мову Дзяніс Івашын.

Падчас выкарыстаньня інфармацыі актыўная спасылка на крыніцу абавязковая.
(Creative Commons — Attribution 4.0 International — CC BY 4.0 )

Рабіце рэпост і дзяліцеся зь сябрамі.
Падпісвайцеся на старонкі супольнасьці InformNapalm у Фэйсбук / Твітэр / Telegram
і апэратыўна атрымлівайце інфармацыю пра новыя матар’ялы.