Агрэсія Расеі супроць Украіны шчыльна зьвязаная з акупацыяй часткі тэрыторыі Грузіі, якую расейцы выкарыстоўваюць як ваенны пляцдарм. Такі ж лёс напаткаў і акупаваны ўкраінскі Крым, які стаўся пляцдармам для «сірыйскага экспрэсу». Гэтая ўзаемасувязь выразна адсочваецца з аналізу расьледаваньняў міжнароднае выведвальнае супольнасьці InformNapalm.

У панядзелак увечары, 17 ліпеня, прэзыдэнт Украіны Пятро Парашэнка прыбыў з працоўным візытам у Грузію, падчас якога ўкраінскім і грузінскім бакамі была падпісаная дэклярацыя пра ўзаемную падтрымку сувэрэнітэту й тэрытарыяльнае цэласнасьці.

Якім чынам акупацыя часткі грузінскае тэрыторыі Расеяй ўплывае на агрэсію РФ супраць Украіны на Данбасе InformNapalm раскрыў у больш за 30 OSINT-расьледаваньнях. У матар’ялах пададзеная інфармацыя пра вайскоўцаў з складу 7-й расейскай вайсковай акупацыйнай базы (г. Гудаўта, акупаваная Абхазія, Грузія), якія ў складзе бандфармаваньняў тэрарыстычнага ўтварэньня «Л/ДНР» прымалі ўдзел у баявых дзеяньнях на Данбасе.

Інсайдэры выведвальнае супольнасьці InformNapalm таксама паведамілі, што прычынаю нядаўняе адстаўкі камандыра 7-й вайсковай базы, генэрал-маёра М. Касабокава, сталася маштабная выцечка інфармацыі што да ўдзелу вайскоўцаў у вайне супроць Украіны, масавы адток кантрактнікаў, агульная неспрыяльная атмасфэра сярод вайскоўцаў і нізкая боегатоўнасьць.

Маштабныя выцечкі інфармацыі будуць працягвацца й далей, бо ў архівах InformNapalm захоўваецца яшчэ дастатковая колькасьць матар’ялаў пра злачынствы вайскоўцаў 7-й вайсковай базы. Таму новы камандыр базы – палкоўнік І. Ягораў, прызначаны напачатку 2017 году, – цалкам мажліва, будзе мець таксама праблемую кар’еру.

Выяўлены чарговы ваенны злачынец РФ. Ад акупацыі Грузіі да Украіны.

Зь сьнежня 2016 году валянтэры InformNapalm узялі пад асаблівы кантроль сацыяльны профіль вайскоўца-кантрактніка 7-й вайсковай базы Дэнчыка Містыша (архівы профілю 1, 2; фотаальбому 1, 2; кантактаў 1, 2). У ягоным фотаальбоме маюцца здымкі зь лягероў падрыхтоўкі да перакідваньня ва Украіну з Растоўскае вобласьці батальённа-тактычнай групы вайскоўцаў 7-й вайсковай базы. Атрымалася ўсталяваць сапраўднае імя вайскоўца. Псэўданім «Містыш» у сацсеціве выкарыстоўвае Дзяніс Паўлавіч Менцэль, родам з г. Геленджык. Там жа жывуць і ягоныя сваякі – бацька, маці і брат.

Сярод фатздымкаў Дзяніса Менцэля маецца здымак, выкладзены 11 сьнежня 2015 году, у якім зафіксаваны расейскі вайсковец з нарукаўнай нашыўкай з сьцягам так званай «Новороссии» (рас.).

Дзеля ідэнтыфікацыі таварыша ў службе Менцэля быў патрэбны некаторы час, бо аб’екту не было ў сьпісе сяброў у сацыяльным профілі, які збольшага складаўся з кантрактнікаў 7-й вайсковай базы. Пасьля паглыбленага OSINT-аналізу, атрымалася вызначыць, што ў фота зафіксаваны расейскі вайсковец Павал Пастэрнак.

Павал Пастэрнак, 1987 г.н., родам з Забайкальскага краю.

У сацыяльных сетках: “ОК” – старонка схаваная для прагляду, “VK”: №1 – старонка неактыўная зь  сьнежня 2016 году, №2 – неактыўная з 2013 году, facebook – старонка неактыўная з 2014 году. Нягледзячы на тое, што ў сацсетках маецца шмат старонак Пастэрнака, яны зьяўляюцца ня надта інфарматыўнымі, аднак з дапамогаю іх былі вызначаныя некаторыя дадатковыя дадзеныя.

Пра сапраўднасьць прозьвішча Пастэрнак сьведчаць профілі ягоных сваякоў: жонкі Вольгі Пастэрнак “VK” №1 , №2, “ОК”- дзейны профіль; маці – Ніны Пастэрнак (Загібалава) “VK”, “ОК”  (характэрна, што профілі сваякоў Паўла ў сацсеціве “ОК” таксама маюць абмежаваньне для прагляду). Вызначанае, што Павал Пастэрнак станам на 2012-2013 гады служыў у паліцыі МУС РФ.

З 2015 году П. Пастэрнак служыць паводле кантракту на 7-й вайсковай базе ЗС РФ.

Фота з нарукаўным шаўронам зь сьцягам «Новороссии» можа быць ускосным доказам, але гэта не адзіны аргумант. У дэталізацыі інфармацыі нам дапамог фігурант аднаго з папярэдніх расьледаваньняў InformNapalm, зямляк Пастэрнака з Чыты, экс-памочнік машыніста “РЖД” і колішні вайсковец 17-й АМСБр з Чачэніі, які служыў у шэрагах расейска-тэрарыстычных войскаў, Анатоль Івачоў. Цікава, што ён зьвяртаўся нават з адкрытымі лістамі да прэзыдэнта РФ Пуціна з просьбаю накіраваць яго ў Сірыю дзеля выплаты пазыкаў.

Чытайце таксама: Беспрацоўе і вайна як праца: расейскі машыніст праз пазыкі пайшоў ваяваць на Данбасе.

Сярод фатаздымкаў А. Івачова шмат здымкаў з Данбаса, у тым ліку зь геалякацыяй мяйсцовасьці. Найбольш цікавым ёсьць фота, выкладзенае ў ягоным альбоме 26 сьнежня 2016 году зь геатэгам “Партызанская вуліца, Шахтарск, Украіна”. У гэтым фота Івачоў пазуе з баявым таварышам у акупацыі Данбасу. Як бачым, у кадар паноўна патрапіў Павал Пастэрнак.

Такім чынам, маем чарговы выпадак фіксацыі дзейных вайскоўцаў 7-й вайсковай базы ў складзе незаконных збройных фармаваньняў на часова акупаванай тэрыторыі Украіны. У 2016 годзе валянтэры InformNapalm выявілі кантрактнікаў С. Фіногіна й М. Хаменку, якія сумяшчалі службу ў расейскай арміі з удзелам у бандфармаваньнях «Л/ДНР».

• Cклад і ўзбраеньне 7-й акупацыйнай вайсковай базы

  7-я вайсковая база, в/ч 09332 (Грузія, акупаваная Абхазія, г. Гудаўта), 49-й арміі Паўднёвае вайсковае акругі РФ, пачала фармавацца ў 2009 годзе – праз год пасьля расейскага ўварваньня ў Грузію. База сфармаваная на аснове 131-й Майкопской асобнай мотастралковай брыгады, якую падчас спробы штурму г. Грознага ў навагоднія дні 1994-1995 гадоў разьбілі чачэнскія паўстанцы.

  Структура акупацыйнага злучэньня ў Абхазіі складаецца з сухапутнага кампанэнту ў выглядзе ўзмоцненай цяжкой брыгады: 4 мотастралковыя батальёны, танкавы батальён, 2 артылерыйскія дывізыёны, рэактыўны дывізыён, рота снайпэраў, рота БЛА, выведвальны батальён, а таксама іншыя асобныя падразьдзяленьні й забесьпячэньне. Асабовы склад злучэньня ўкамплектаваны паводле зьмяшанага прынцыпу жаўнерамі-тэрміноўцамі й кантрактнікамі. Спробы камандаваньня ўкамплектаваць базу выключна вайскоўцамі кантрактнае службы не спраўдзіліся. Гэтак, кантрактнікамі на 100% укамплектаваны толькі адзін мотастралковы батальён, які зьяўляецца ядром батальёна-тактычнае групы, якая прыцягваецца да баявых дзеяньняў супроць Збройных Сілаў Украіны на Данбасе.

  Асноўнае ўзбраеньне гудаўцкае базы: каля 50 адзінак танкаў Т-72Б3 (якімі замянілі Т-90), больш за 150 адзінак БТР-82 і БТР-80, 36 адзінак 152-мм САУ «Акацыя», 18 адзінак РСЗВ «Град», а таксама іншае ўзбраеньне й тэхніка. Асноўныя палігоны, якія выкарыстоўваюць акупанты для баявой падрыхтоўкі на мейсцы, – прыморскі Нагвалоў і горны Цэбельда. Падразьдзяленьні 7-й вайсковай базы, у тым ліку мотастралкі, вайсковыя выведнікі й вайскоўцы радыёэлектроннай выведкі, стала служаць побач з адміністрацыйнай мяжой у Гальскім раёне і Кадорскай цясьніне.

  Апроч гэтага ў склад вайсковай базы ўваходзяць:

  • авіяцыйная камэндатура, якая забясьпечвае пэрыядычныя палёты лятакоў і гэлікоптэраў ПКС ЗС РФ на аэрадром Гудаўта;
  • група зэнітна-ракетных дывізыёнаў (уключае сродкі вайсковай СПА – ЗРК «Аса», «Страла-10» і трохдывізыйны зэнітна-ракетны полк ЗРС С-300 (24 пускавыя ўстаноўкі), якія разгорнутыя для баявой варты ў н/п Агудзера і Прыморскае;
  • радыётэхнічнае падразьдзяленьне, сродкі варты якога знаходзяцца на тэрыторыі Сухумскага аэрапорту Бабушэра.

• 7-я вайсковая база ў расьледаваньнях InformNapalm

  • Баявыя разьлікі САУ “Акацыя” 7-й вайсковай базы, якія “партызаняць” у лясох уздоўж мяжы з Украінай.
  • «Данецкі экспрэс» – ідэнтыфікацыя расейскай тэхнікі і ўзбраеньня, якое перакідваюць на Данбас.
  • «Інтэрны» – мэдычнае падразьдзяленьне 7-й вайсковай базы з Абхазіі на мяжы з Украінай.
  • Рэактыўная артылерыя 7-й расейскай акупацыйнай базы з Абхазіі на мяжы з Данбасам.
  • “З мандарынавага раю ва ўкраінскае пекла”: як расейскіх кантрактнікаў добраахвотна-прымусовым чынам выпраўляюць забіваць украінцаў.
  • Вайскоўцаў 7-й вайсковай базы РФ з Абхазіі за ўдзел у баёх на Данбасе ўзнагароджваюць мэдалямі.
  • Тэрміноўцаў 7-й вайсковай базы РФ масава вярбуюць у кантрактнікі для “ўкраінскіх камандыровак”.
  • Міхос “адважны” – выведнік 7-й в/базы, кавалер мэдалю “За адвагу”.
  • Чарговыя ўзнагароджаныя з 7-й акупацыйнай вайсковай базы ў выніку ўкраінскіх камандыровак.
  • Вайскоўцы 7-й вайсковай базы ЗС РФ перагульваюць падчас пераапрананьня ў баявікоў “ДНР/ЛНР”.
  • Легенда-біяграфія “колішняга” вайскоўца 7-й вайсковай базы.
  • Зафіксаванае маштабнае перакідваньне сілаў і сродкаў ЗС РФ з акупаванай Абхазіі.
  • Расея перакідвае тэхніку 7-й вайсковай базы ў Растоўскую вобласьць.
  • Кантрактнік ЗС РФ з 7-й вайсковай базы ваюе ў складзе бандфармаваньняў “ДНР”.
  • «Калі няма што рабіць»: Гульні расейскіх акупантаў на Данбасе.
  • «Падвойны ўдар» Лі па афіцэрах СПА Збройных Сілаў РФ
  • Гудаўта – Растоў – Данбас – Хмэймім – Службовы сьпіс расейскага акупанта
  • Дынастыя расейскіх вайсковых злачынцаў. Біяграфія акупанта
  • Новая сукенка ВВХ: «А кароль голы!»
  • Будні й сьвяты растоўскага рэзэрву арміі «наваросіі»
  • Выяўленыя дакуманты пра склад БТГр 7-й в/базы, якая знаходзіцца ў «растоўска-ўкраінскай камандыроўцы»
  • 21 з 35: апазнаныя артылерысты 7-й в/базы ЗС РФ, датычныя да абстрэлаў Украіны. Інфаграфіка
  • Love Story 3: любоўны трыкутнік расейскага акупанта
  • Расейскага выведніка з 7-й вайсковай базы выкрыў бультэр’ер з Горлаўкі
  • Выкрытыя выведнікі 7-й вайсковай базы МА РФ, якія ваявалі ва Украіне
  • Стэпы Данбаса: расейскія жаўнеры-калмыкі «заблукалі» ў стэпах Украіны
  • Мінабароны Расеі заахвочвае кантрактнікаў, якія ваявалі ва Украіне, праз залічэньне ў элітныя вучэльні
  • Кавалер Мэдалю Ордэна «За заслугі перад Айчынай» і іншыя «ветэраны Данбаса» з 7-й вайсковай базы
  • Расейскія кантрактнікі ўцякаюць ад «украінскіх камандыровак» на Далёкі Усход
  • РФ нарошчвае свае вайсковыя сілы ў Грузіі. Новыя С-300 у акупаванай Абхазіі
  • 7-я акупацыйная вайсковая база Збройных Сілаў РФ у авангардзе расейскай прапаганды

Матар’ял да публікацыі падрыхтаваў на падставе ўласнага OSINT-расьледаваньня Іраклі Камахідзэ адмыслова для сайту InformNapalm.

Пераклаў на беларускую мову Дзяніс Івашын.

Падчас выкарыстаньня інфармацыі актыўная спасылка на крыніцу абавязковая.
(Creative Commons — Attribution 4.0 International — CC BY 4.0 )

Рабіце рэпост і дзяліцеся зь сябрамі.
Падпісвайцеся на старонкі супольнасьці InformNapalm у Фэйсбук / Твітэр / Telegram
і апэратыўна атрымлівайце інфармацыю пра новыя матар’ялы.