У выніку новага OSINT-расьледаваньня міжнародная выведвальная супольнасьць InformNapalm выявіла расейскіх вайскоўцаў з складу 120-й артылерыйскай брыгады (в/ч 59361, дысьлякацыя – г. Юрга Кемераўскае вобласьці, РФ) 41-й агульнавайсковай арміі Цэнтральнае вайсковае акругі, якія напачатку 2016 году знаходзіліся у «данбаска-сірыйскай камандыроўцы». Асноўнымі крыніцамі інфармацыі зьяўляюцца самі расейскія кантрактнікі, якія публічна выхваляюцца сваімі баявымі ўзнагародамі. Таксама рэгіянальныя расейскія СМІ, якія ў адрозненьне ад цэнтральных мэдыярэсурсаў не саромеюцца агучваць навіны пра сірыйскую вайсковую кампанію для сваёй малой аўдыторыі.
Нагадваем, што напрыканцы 2016 году InformNapalm апублікаваў доказы «ўкраінскае камандыроўкі» 120-й артылерыйскай брыгады. У матар’яле было зазначанае, што артылерысты 120-й брыгады апроч «растоўска-ўкраінскай камандыроўкі», былі зафіксаваныя ў траўні 2016 году ў Сірыі. Першасную інфармацыю што да перакідваньня падразьдзяленьня 120-й артбрыгады ў Сірыю яшчэ ўвосень 2015 году агучвала і ўкраінская вайсковая выведка.
Аб’ект расьледаваньня
- Сяргей Турканаў
Нарадзіўся 2 лютага 1988 г. Родам з г. Беразоўскі Кемераўскае вобласьці, РФ. Вайсковец-кантрактнік 120-й артылерыйскай брыгады. У сацыяльных сетках – “VK” (архівы профілю, фотаальбому, кантактаў).
Узнагароджаны мэдалём «Удзельніку вайсковай апэрацыі ў Сірыі» паводле загаду міністра абароны РФ №155 з 16 сакавiка 2016 году.
Характэрна, што ў фотаальбоме свайго профілю фатаздымкі, якія сьведчаць пра ягоны вайсковы статус, ён не захоўвае й карыстаецца псэўданімам “Шрам”. Але ў выпаду з мэдалём ён вырашыў усё ж выхваліцца: 17 студзеня 2017 году ў сваім відэаальбоме Турканаў выклаў відэа рэгіянальнае тэлевізіі г. Беразоўскі, у якім паведамляецца пра ягонае ўзнагароджаньне пазначаным вышэй мэдалём за баявую камандыроўку ў Сірыю, якая доўжылася з студзеня па красавік 2016 году. Гэтая ж інфармацыя зьявілася на сайце адміністрацыі Бярозаўскае гарадзкое акругі 16 студзеня 2017 году.
- Яўген Ігаравіч Бялінаў
Нарадзіўся 22 жніўня 1986 году. Родам з г. Шарыпава Краснаярскага краю, РФ. Вайсковец-кантрактнік 120-й артылерыйскай брыгады, мае званьне малодшага сяржанту. У сацыяльных сетках – “VK” (архівы профілю, фотаальбому, кантактаў).
Узнагароджаны мэдалём «Удзельніку вайсковай апэрацыі ў Сірыі» паводле загаду міністра абароны РФ №155 з 16 сакавiка 2016 году. Узнагароднае пасьведчаньне з подпісам камандыра в/ч 59361 палкоўніка Дзяніса Цехановіча. Таксама мае статус ветэрану баявых дзеяньняў.
У альбоме профілю фатаздымкі, што сьведчаць пра ягоны вайсковы статус, ён не захоўвае, але, як і ў выпадку з Турканавым, ён таксама вырашыў выхваліцца сваёй новай мэдалькай.
- Яраслаў Дзьмітрыевіч Савельеў
Нарадзіўся 18 ліпеня, год нараджэньня – н/д. Меркавана, родам з г. Пракоп’еўск Кемераўскае вобласьці, РФ. Вайсковец-кантрактнік 120-й артылерыйскай брыгады. У сацыяльных сетках – “VK” (архівы профілю, фотаальбому, кантактаў).
Узнагароджаны мэдалём «Удзельніку вайсковай апэрацыі ў Сірыі». У фота пасьведчаньня да ўзнагароды ён зрабіў рэтушаваньне свайго званьня, найменьня ўзнагароды, нумару загаду й рэгаліяў камандыра в/ч. Але згодна зь ідэнтычным почыркам ва ўзнагародным пасьведчаньні згаданага вышэй Бялінава, цалкам мажліва, узнагароджаны ён паводле таго ж загаду МА РФ.
У фотаальбоме профілю захоўвае некалькі здымкаў, якія сьведчаць пра прыналежнасьць да ЗС РФ, у тым ліку з часоў «сірыйскае камандыроўкі».
Трох фігурантаў з аднаго артылерыйскага злучэньня цалкам дастаткова, каб пацьвердзіць ранейшую інфармацыю што да «сірыйскай камандыроўкі» 120-й артылерыйскай брыгады зь Юргі. Праз вывучэньне іхных кантактаў можна знайсьці дзясяткі іншых сьведчаньняў пра прысутнасьць вайскоўцаў гэтага падразьдзяленьня ў Сірыі. Напрыклад, старонка таварыша ў службе Яраслава Савельева – Піліпа Гагарынава (архівы профілю, фотаальбому, кантактаў) – на якой захаваныя фатаздымкі зь Блізкага Усходу.
Як было зазначанае раней, паводле назіраньняў InformNapalm, «сірыйскія камандыроўкі» падразьдзяленьняў расейскай арміі й флёту ня надта розьняцца ад «растоўска-ўкраінскіх камандыровак». Падразьдзяленьні, што накіроўваюцца ў зону баявых дзеяньняў, зьяўляюцца тактычнымі групамі з батальённым або ротным складам, укамплектаваныя вайскоўцамі кантрактнае службы. Досыць часта ў Сірыю дасылаюць тыя ж падразьдзяленьні й вайскоўцаў, якія ўжо атрымалі баявы досьвед у выніку баявых камандыровак на Данбас. Колькасьць падразьдзяленьняў расейскай арміі й флёту, ідэнтыфікаваных InformNapalm ў Сірыі, на гэты момант сягае ўжо 16 вайсковых частак (!):
- Балтыйскі флёт – 336-я АБрМП (879-й АДШБ гэтай жа брыгады);
- Паўночны флёт – 200-я АМСБр і 61-я АБрМП;
- Чарнаморскі флёт – 810-я АБрМП;
- Заходняя вайсковая акруга – 27-й АМСБр і 20-ы полк РХБА (ЦВС-1А);
- Усходняя вайсковая акруга – 200-я АртБр;
- Цэнтральная вайсковая акруга – 21-я АМСБр, 28-я АМСБр, 74-я АМСБр, 7-я ТБр і 120-я АртБр;
- Паўднёвая вайсковая акруга – 34-я АМСБр, 7-я в/база, 291-я АртБр і 66-я АБрСувязі.
Усе гэтыя падразьдзяленьні пэўным чынам удзельнічалі ва «ўкраінскіх камандыроўках». І гэта без уліку падразьдзяленьняў ССА, ГРУ і ПДВ ЗС РФ і дарадцаў, а таксама ПКС РФ і, вядома, так званых расейскіх прыватных вайсковых кампаніяў, якія былі перакінутыя ў Сірыю значна раней за іншыя падразьдзяленьні. Апроч гэтага ў Сірыі задзейнічаны і сакрэтны рэзэрв расейскіх спэцслужбаў – баявікі-“добраахвотнікі” – якія маюць досьвед баявых дзеяньняў на Данбасе.
Яшчэ ў сьнежні 2015 году InformNapalm апублікаваў доказы «сірыйскае камандыроўкі» вайскоўцаў артылерыйскае брыгады Паўднёвае вайсковае акругі, гл. «Усход – справа тонкая: 29 вайскоўцаў з 291-й артбрыгады ЗС РФ у Сірыі».
120-я артылерыйская брыгада фігуруе ў трох эпізодах расьледаваньняў InformNapalm, як у кантэксьце «сірыйскіх», гэтак і «растоўска-ўкраінскіх камандыровак»:
- Падразьдзяленьне 120-й артылерыйскай брыгады зь Юргі ў Мілерава
- 120-я АБр ЗС РФ на подступах да сірыйскае Пальміры
- Атрыманыя доказы «украінскае камандыроўкі» 120-й артбрыгады ЗС РФ
Глядзіце таксама Базы дадзеных фіксацыі кадравых расейскіх вайскоўцаў і доказаў іхнага ўдзелу ў баявых дзеяньнях ва Украіне на баку аб’яднаных расейска-тэрарыстычных сілаў, якія даступныя праз сталую спасылку: https://informnapalm.org/database.
Даведка пра склад і ўзбраеньне 120-й Абр
Матар’ял да публікацыі падрыхтаваў на падставе ўласнага OSINT-расьледаваньня Іраклі Камахідзэ.
Пераклаў на беларускую мову Дзяніс Івашын.
(CC BY 4.0) Інфармацыя падрыхтаваная адмыслова для сайту InformNapalm.org, падчас поўнага або частковага перадруку й выкарыстаньня матар’ялу наўпроставая спасылка на аўтара і наш праэкт абавязковая.
Заклікаем чытачоў актыўна пашыраць нашыя публікацыі ў сацыяльных сетках, на форумах і СМІ. Наданьне матар’ялам расьледаваньняў шырокае агалоскі здатнае зьмяніць хаду інфармацыйнага і баявога супрацьстаяньня з Крамлём.
Падчас вышкалаў «Захад-2017» расейскі Ка-52 выпусьціў тры ракеты і пашкодзіў машыну кіраваньня комплексу «Леер-3»
Дзяніс Івашын: Беларусь – гэта лайт-вэрсія ДНР. Гарачы камэнтар тэлеканалу Белсат
Кантракт у баявікі “наваросіі” аформлены ў Валгаградзкім ваенкамаце
Усход – справа тонкая: 29 вайскоўцаў з 291-й артбрыгады ЗС РФ у Сірыі
22-я брыгада СпН ГРУ РФ. Два мэдалі за Данбас і адпачынак у Нікарагуа